Një nga krerët e VLEN-it, Izet Mexhiti, në konventën promovuese të koalicionit në Gostivar, vlerësoi se kandidati i VLEN-it për kryetar komune, Nevzat Bejta, ka qenë dhe mbetet model i udhëheqjes së komunave.
Mexhiti tha se së bashku me Nevzat Bejtën, në momente kyçe politike, kanë ditur t’u dalin përballë politikave të dëmshme të Nikolla Gruevskit dhe t’i japin vendit një orientim tjetër drejt integrimeve euroatlantike, ndërsa për Gostivarin, sipas tij, përvoja e Bejtës është e pakontestueshme.
“Mund të kemi dilema për Nevzatin për pozita të tjera, por për kryetar komune ka qenë dhe mbetet model se si udhëhiqet një komunë”, tha Mexhiti.
Ai theksoi se Bejta ka qenë udhërrëfyes për kryetarët e komunave në të kaluarën, duke përmendur projektet konkrete gjatë udhëheqjes së tij, përfshirë përmirësimin e infrastrukturës, shkollave dhe investimet në qytet.
Mexhiti theksoi se ekziston edhe një konstatim i përbashkët tek qytetarët e Gostivarit.
“Të gjithë gostivarasit thonë se për Gostivarin ka punuar vetëm Nevzat Bejta”, nënvizoi Mexhiti.
Në fund, ai theksoi se Bejta është kandidati i duhur për dy arsye: përvoja dhe përkushtimi i plotë ndaj Gostivarit, pasi nuk ka pretendime të tjera politike.
