Kryetari i komunës së Çairit dhe njëri nga liderët e VLEN, Izet Mexhiti në “Debat në Shenja” ka komentuar edhe zgjedhjet në komunën e Kërçovës ku shqiptarët nuk arritën të marrin komunën.
Për këtë tha se duhet pyetur BDI-në, sepse siç tha, ata kanë pasur dy kandidatura.
“Për Kërçovën, që në fillim në raundin e parë keni pasur dy kandidatura të BDI-së, edhe z. Dehari edhe Shkodrani (Alili) që doli i pavarur, por ka qenë pjesë e strukturave të BDI-së, e treta ka qenë e jona. Për këtë duhet pyetur BDI-në, sepse favorit në komunën e Kërçovës ka qenë BDI dhe fjalën kryesore e ka pasur BDI. Çka nuk funksionoi? ka pasur edhe situata të jashtëzakonshme me sulme me përgjime që e ka demotivuar votuesin edhe brenda dhe jashtë, një betejë e humbur që duhet të nxjerrim konkluzione për ta rikthyer”, tha Mexhiti.
VLEN, sipas tij, ka kontribuar në fitoren e Çashkës ku nuk ka nxjerr kandidat të vetin, kandidati ka qenë i AKI-së dhe BDI-së dhe siç thotë, ne e kemi ndihmuar, ndërsa në Butel tha se ka qenë një garë vetëm për të fituar pikë politike.
“Kemi fituar Çashkën që është fitore historike, pastaj Dollnenin, por duhet të bëhen analiza pa emocione dhe të nxirren konkluzione dhe në të ardhmen të dalim më mirë siç është rasti me Kërçovën dhe Bërvenicën”, ka thënë Mexhiti.
Sa i takon Bërvenicës, thotë se kërkesa e tyre ka qenë që AKI të mos nxjerr kandidaturë si në Çashkë që të mbyllet gara që në raund të parë, por kjo nuk ndodhi, në raund të dytë shkoi kandidati i VMRO-së dhe Haqim Ramadani i cili është kandidat i VLEN.
“Pastaj Haqimi e ka ndryshuar strategjinë, pa konsultime me VLEN, të shkyjë pllakatat e VLEN, por ne e kemi mbështetur përsëri Haqimin. Por ai më pas ka bërë llogaritë se më mirë i del nëse del mbi VLEN-in, e kemi respektuar edhe këtë strategji, në raundin e dytë e ka menduar se i del më mirë kjo. Por nuk mundet që në raundin e parë të jesh i varur dhe më pas i pavarur”, shprehet mes tjerash Mexhiti.
