Zv/kryeministri i parë, Izeti Mexhiti, ka njoftuar përmes një postimi në Facebook se pensionet në vend janë rritur me 5,000 denarë brenda një periudhe 9-mujore.
Sipas Mexhitit, kjo rritje përfiton mbi 340,000 pensionistë dhe e çon mbështetjen financiare për këtë kategori në një nivel të ri. Ai theksoi se rritja e fundit prej 2,500 denarësh është dëshmi e mbajtjes së premtimeve dhe e përpjekjeve të vazhdueshme për të përmirësuar standardin e jetesës së pensionistëve.
“Vetëm brenda 9 muajve qeverisje, pensionet janë rritur me 5.000 denarë, duke përmbushur një nga premtimet kryesore,” shkruan Mexhiti në postimin e tij. Ai e cilësoi këtë si rezultat të një qasjeje të përgjegjshme dhe të vendosur të qeverisë për të mbështetur këtë kategori të rëndësishme të shoqërisë dhe siguroi se përkushtimi ndaj mirëqenies së tyre mbetet i palëkundur.
Lajmi pritet të ketë një ndikim të rëndësishëm tek mijëra pensionistë në vend.
Mexhiti: Pensionet rriten me 5,000 denarë brenda 9 muajve!
