Në Çair ka nisur transformimi i Shkollës fillore “Jashar Bej Shkupi” në lagjen Dyqanxhik. Pas identifikimit të problemeve që pengonin zhvillimin normal të mësimit dhe sigurinë e komunitetit shkollor, sot kanë nisur punimet për prishjen e objektit të vjetër.
Zëvendëskryeministri i parë dhe kandidati për kryetar të komunës së Çairit, Izet Mexhiti, theksoi se në vend të objektit të amortizuar do të ngrihen hapësira moderne dhe funksionale.
“Ka filluar rrënimi i objektit të vjetër i cili përbënte rrezik për nxënësit, mësuesit dhe stafin. Në vend të tij do të ndërtohet një sallë sportive moderne, një kënd i posaçëm për fëmijë dhe katër klasa të reja,” – deklaroi Mexhiti.
Ai nënvizoi se ky investim do të ketë ndikim të drejtpërdrejtë në përmirësimin e kushteve mësimore dhe do ta shndërrojë shkollën në një institucion bashkëkohor.
“Me këtë investim, Shkolla ‘Jashar Bej Shkupi’ do të bëhet shkolla e dytë në Çair që funksionon vetëm në një ndërrim. Kjo do të ofrojë më shumë kohë dhe hapësirë për mësim, aktivitete jashtëshkollore dhe zhvillim të gjithanshëm të nxënësve,” tha ai.
Sipas Mexhitit, projekti nuk është vetëm një ndërhyrje ndërtimore, por një dëshmi se prioriteti mbetet siguria e fëmijëve dhe standardet e reja në arsim.
“Ne punojmë. Ne ndërtojmë. Ne veprojmë për të gjithë. Sepse ky vend VLEN! Investojmë në të ardhmen, ndërtojmë siguri, krijojmë hapësira dhe mbështesim qytetarët. Sepse ky vend është për të gjithë,” – u shpreh Mexhiti.
Ky projekt shihet si një hap i rëndësishëm drejt modernizimit të shkollave në komunë, duke krijuar kushte më të mira për nxënësit dhe mësimdhënësit.
