Gjatë tubimit të koalicionit VLEN me qytetarë në Kumanovë, njëri nga liderët e koalicionit dhe kandidat për kryetar të komunës së Çairit, Izet Mexhiti theksoi se fushata zgjedhore duhet të fokusohet tek problemet konkrete të qytetarëve dhe zgjidhjet që ndikojnë drejtpërdrejt në jetën e tyre të përditshme.
“Fushatën zgjedhore mundohemi ta fokusojmë tek zgjidhjet lokale dhe problemet lokale, sepse qytetarët kanë vetëm një jetë”, theksoi ai, duke shtuar se ikja e shqiptarëve është rezultat i kushteve të dobëta në infrastrukturë, arsim, shëndetësi dhe standard jetësor.
Duke krahasuar qasjen e qeverisë aktuale me të kaluarën, Mexhiti theksoi disa nga ndryshimet thelbësore.
“Kjo qeveri për 15 muaj ka ndarë 1 miliard euro për të respektuar gjithë vendin në frymën e Marrëveshjes së Ohrit. Qeveritë e kaluara kanë ndarë po aq, por për të ndryshuar historinë dhe projekte korruptive, aspak në interes të shqiptarëve, dhe kjo sigurisht po u dhemb”.
Ai nënvizoi se VLEN ka sjellë konkurrencë në ide dhe programe, duke e thyer monopolin politik shumëvjeçar.
“Në të kaluarën ka pasur monopol politik, ndërsa sot VLEN ka sjellë konkurrencë në programe dhe ide, jo kush kritikon më shumë. Ata që s’kanë vizion dalin te ofendimet, kritikat dhe karta nacionaliste”.
Më tej, Mexhiti kujtoi dështimet e qeverive të mëparshme në çështje kyçe kombëtare.
“Për 20 vite nuk sollën as Ligjin për ushtarët e luftës, as Ligjin për gjuhën shqipe. Për temat e mëdha do të flasim në zgjedhjet parlamentare, shqiptarët tash e kanë VLEN-in që mund t’u dalë zot çështjeve shqiptare më mirë se ata”.
Theksoi gjithashtu se VLEN ka dëshmuar integritet dhe pastërti politike.
“Nuk kemi asnjë aferë korruptive dhe ai që pati u bashkua me listat e zeza. Shqiptarët kësaj radhe kanë vendosur t’i japin shans VLEN-it kudo që janë, dhe pas 4 vitesh le të bëhet krahasimi në punë”.
Mexhiti u bëri thirrje qytetarëve që të zgjedhin zhvillimin, dinjitetin dhe ndryshimin e përgjegjshëm.
“Është koha që shqiptarët të votojnë për ata që punojnë për ta, jo për ata që i zhgënjyen për dy dekada”, tha për fund ai.
