Maqedoni

Mexhiti në Tetovë: VLEN-i, garanci për punë konkrete dhe zhvillim, më 19 tetor rrethoni numrin 7

Koalicioni VLEN përmbylli sot fushatën për zgjedhjet lokale të 19 tetorit me tubimin madhështor në qytetin e Tetovës.Në fjalimin e tij, njëri nga liderët e këtij koalicioni, Izet Mexhiti theksoi se për herë të parë në historinë e demokracisë lokale një palë
ka folur për projekte të realizuara e të planifikuara, ndërsa tjetra ka
shërbyer vetëm me ofendime dhe emra të banorëve të “Fermës së kafshëve”. Ai bëri thirrje që tetovarët dhe qytetarët e çdo komune tjetër më 19 tetor të votojnë për ata që punojnë për qytetin, jo për ata që merren me fjalë boshe, dhe të shprehin vullnetin e tyre të lirë, pa presion e tension.

Në vazhdim po ua sjellim të plotë fjalimin e Izet Mexhitit në tubimin përmbyllës të fushatës zgjedhore në Tetovë:

Të nderuar drejtues të VLEN-it, Të nderuar deputetë, ministra e funksionarë,
Të dashur aktivistë të forumit rinor dhe të forumit të gruas,Të nderuar kandidatë për kryetarë dhe për këshilltarë,
Motra e vëllezër, qytetarë të nderuar,

Sonte, në përmbyllje të kësaj fushate, jemi mbledhur këtu, në sheshin e Tetovës, për ta kremtuar këtë maratonë të demokracisë dhe për ta përmbyllur një kapitull të rëndësishëm elektoral, por edhe për ta shprehur mbështetjen tonë për kryetarin e tanishëm e të ardhshëm të
Tetovës, Bilall Kasami.

Dhe, kur kemi arritur në fund të kësaj fushate, sonte nuk jemi më këtu për të mbajtur fjalime që të dëshmojmë se kush jemi ne e kush janë ata.Mendoj se kjo tashmë është e qartë dhe çfarëdo që të themi ne, nuk mund ta shprehim më saktë seç e kanë thënë ata vetë me gojën e tyre.

Prandaj, unë sonte dua të përçoj vetëm dy mesazhe dhe të bëjnjë thirrje.
Mesazhi im i parë është se për herë të parë në historinë e demokracisë sonë ne kemi pasur një fushatë ku njëra palë ka folur për projekte të
realizuara e të planifikuara të pushtetit lokal dhe ata jemi ne, si dhe një palë tjetër që ka folur për folklorizma, por që nuk ka ofruar as
edhe një argument konkret se çfarë kanë bërë në pushtetin lokal që e kanë pasurshumë vite dhe çfarë do të bënin nëse do ta fitonin përsëri
ndonjë komunë. Ia filluan dhe e përfunduan fushatën duke ofenduar e duke u shërbyer me emrat e banorëve të “Fermës së kafshëve”. Andaj dallimi është i qartë dhe unë dua që ju më 19 tetor ta vlerësoni këtë dallim.

Mesazhi i dytë ka të bëjë me Tetovën. Ne të gjithë jemi dëshmitarë se njeriu i parë që seriozisht është marrë me punët e Tetovës në këtë katërvjeçar është Bilall Kasami. Prandaj, tetovarët jo që kanë mundësi, por më shumë e kanë detyrim për veten e tyre e për familjet e tyre që ta mbështesin Bilallin, sepse sot më shumë se fjala jonë flet puna e tij.
Unë jam i bindur se edhe në katër vitet e ardhshme ai do të jetë kujdestari dhe kryetari më i mirë i qytetit më të madh të shqiptarëve në vendin tonë.

Ndërsa thirrja ime është që të dielën ta kemi një ditë feste, kur bashkë me familjet tona do të dalim ta shprehim vullnetin tonë të lirë, pa
asnjë presion e tension dhe do të votojmë për ata të cilëve ne u besojmë se do të na përfaqësojnë më së miri në mandatin e ardhshëm katërvjeçar.

Për fund, duke ju falënderuar të gjithëve për këtë fushatë dinjitoze dhe pak të gjatë, dua t’ju them se deri në 2028-tën nuk do të kemi më
zgjedhje, ashtu që ju do të keni kohë të pushoni e ne do të kemi kohë të punojmë.
Ju faleminderit!

Related Posts