Kandidati i VLEN për komunën e Çairit, Izet Mexhiti ka zhvilluar takim me qytetarët e lagjes Dizhon, në konakun e qytetarit të nderuar Ibrahim Mejdi.
Takimi, i cili u mbajt në ambientin mikpritës të oborrit familjar, mblodhi dhjetëra banorë të zonës, përfshirë përfaqësues të të gjitha moshave.
Në një atmosferë familjare e me ndjenjë të thellë afërsie, u diskutua për sfidat dhe mundësitë e zhvillimit të komunës, si dhe për vizionin që Mexhiti dhe ekipi i tij synojnë të sjellin për Çairin.
“Ishte një mbrëmje e mbushur me vlera dhe biseda përmbajtësore, në një oborr që të krijonte ndjesinë e shtëpisë dhe të afërsisë njerëzore,” tha Mexhiti, duke falënderuar me mirënjohje mikpritësit dhe të gjithë të pranishmit.
Ai theksoi se bashkëbisedimet e tilla nuk janë vetëm pjesë e fushatës, por mënyra më e sinqertë dhe më njerëzore për të kuptuar realisht nevojat e qytetarëve.
“Çdo fjalë, çdo mendim dhe çdo pyetje që dëgjuam sonte, është pasuri e çmuar për rrugën tonë politike dhe për misionin tonë të shërbimit publik,” u shpreh ai.
Mexhiti ritheksoi se afërsia me qytetarin, dëgjimi i drejtëpërdrejtë dhe bashkëndërtimi i vizionit janë themeli i filozofisë së tij politike.
“Këto takime janë pasqyra më e qartë e mënyrës se si duam të qeverisim: në afërsi me qytetarin dhe me komunikim të drejtëpërdrejtë,” shtoi Mexhiti.
Takime të tilla po zhvillohen intensivisht në gjithë komunën e Çairit, si pjesë e qasjes së re të VLEN për të ndërtuar një qeverisje më të hapur, më të drejtë dhe më të ndjeshme ndaj halleve të qytetarëve.
