Kryetari i Çairit, pjesë e koalicionit qeveritar në Maqedoninë e Veriut, Izet Mexhiti ka marrë pjesë në tubimet e Vetëvendosjes në Smirë të Vitisë dhe në Kaçanik, në kuadër të fushatës për balotazh të zgjedhjeve lokale në Kosovë që do të mbahen më 9 nëntor.
Këtë e ka bërë të ditur vetë Mexhiti, duke bërë të ditur se ai ka shoqëruar Glauk Konjufcën në këto tubime, me çka kanë bërë thirrje të votohet Arsim Ademi në Viti dhe Jeton Raka në Kaçanik.
Mexhiti vlerësoi se këto komuna, që lidhin Maqedoninë e Veriut me Kosovën, kanë nevojë për ndryshim.
“Smira e Vitisë ishte vendi i takimit me qytetarët e simpatizantët e Lëvizjes Vetëvendosje, të cilët erdhën në numër të shumtë për t’i dhënë përkrahje Arsim Ademit në garën për të parin e këtij qyteti. Bashkë me mikun tim, Glauk Konjufca, e kuptuam se fshati i Labirintit Dardan është rreshtuar prapa Ademit.
Vitia meriton ndryshim! Reformat që po ndodhin në nivel qendror duhet të reflektohen edhe në këtë komunë, duke ofruar zhvillim, drejtësi dhe mundësi të reja për të gjithë qytetarët.
Pas Vitisë, udhëtuam në Kaçanikun e historisë heroike, ku u takuam me Jeton Rakën, kryetarin e ardhshëm të qytetit kufitar.
Edhe Kaçaniku, që lidh shqiptarët e Maqedonisë së Veriut me ata të Kosovës, ka nevojë për ndryshim e reforma. Ashtu si Vitia, edhe Kaçaniku është udhëhequr për disa mandate nga të njëjtit njerëz e parti, prandaj më 9 nëntor është koha për një frymë të re”, tha Mexhiti./TV21
