Izet Mexhiti, zv/kryeministër i parë dhe kandidat për kryetar të komunës Çair nga koalicioni VLEN, ka bërë të ditur se po shkohet drejt përfundimit të ndërtimit të pishinës së re shkollore në lagjen Fushë Topanë. Ky investim prej 1 milionë euro do t’u shërbejë nxënësve për mësim noti, ushtrime, gara dhe aktivitete rekreative gjatë gjithë vitit.
Pishina, me sipërfaqe prej 620 m² dhe thellësi nga 80 cm deri në 1.30 metra, është ndërtuar me themel betoni të armuar dhe strukturë moderne prej çeliku, sipas standardeve më të larta të sigurisë dhe cilësisë.
Punimet po zhvillohen me ritme të shpejta dhe synimi është që në muajin shtator objekti të jetë gati për përdorim, në mënyrë që nxënësit ta shfrytëzojnë që në fillim të vitit shkollor.
Mexhiti theksoi se ky projekt është pjesë e përkushtimit për modernizimin e infrastrukturës arsimore dhe ofrimin e më shumë mundësive zhvillimi për të rinjtë e Çairit.
