Kryetari i komunës së Çairit dhe njëri nga liderët e VLEN në emisionin “Klik plus” në TV21 ka thënë se Ligji për përfaqësim të drejtë është në pjesën finale.
E para, shton Mexhiti, kemi prit 20 vite, nuk ka pasur ligj, por nuk shkuam me parimin që të poentojmë në zgjedhjet lokale.
“Para një periudhe pati një delegacion të qeverisë, ku z Fetai kishte takim në Komisionin e Venecias, është absolvu pa ndonjë vërejtje serioze, është momenti i fundit për ta sjell në Kuvend, është në fazën finale”, tha Mexhiti.
Sipas tij, ky ligj që ka kaluar në mënyrë unanime, minimalisht ka mbështetjen e 70 deputetëve, ndërsa pret edhe opozita ta votojë ligjin që të merr mbështetje edhe më të madhe.
“Është mirë si shqiptarë ta mbështesim, është në frymën e MO-së dhe e avancon këtë çështje. Për herë të parë do ketë ligj”, ka thënë Mexhiti.
Jemi të kënaqur nga puna e ministrave
Sa i takon rikonstruimit të qeverisë, ai thekson se është bërë një ndryshim brenda VLEN, por bisedat kanë qenë që nga marsi ose prilli të ketë një rikonstruim.
“Me siguri do të ketë ndryshime, dinamika e kërkon që të ketë një përforcim të ekzekutivit edhe nga VLEN. Jemi të kënaqur nga puna e ministrave, por ndryshime do të ketë”, ka thënë Mexhiti.
