Zëvendëskryeministri i parë dhe Ministri i Mjedisit Jetësor dhe Planifikimit Hapësinor, Izet Mexhiti, ka inspektuar sot nga afër punimet që po zhvillohen në rrugën “Avram Pisevski” në lagjen Gazi Babë të Çairit. Projekti parasheh ndërtimin e një rrjeti të ri të ujësjellësit, i cili do t’u sigurojë banorëve furnizim të qëndrueshëm dhe të sigurt me ujë të pijshëm.
“Ky investim është dëshmi e qartë se kur punohet me koordinim dhe përkushtim, ndryshimet pozitive bëhen të dukshme. Me këtë projekt, qytetarët e Gazi Babës do të kenë ujë të pastër dhe një infrastrukturë moderne, duke përfituar një cilësi më të mirë jete për shumë vite në vijim,” tha ministri Mexhiti gjatë vizitës.
Mexhiti deklaroi se puna në terren është prioritet, pasi vetëm duke qenë pranë qytetarëve, mund të sigurohet që çdo premtim të kthehet në rezultate konkrete.
“Ne nuk qëndrojmë në zyrë, por jemi pranë banorëve për të dëgjuar nevojat e tyre dhe për të siguruar që çdo projekt të sjellë përfitime reale për qytetarët”, deklaroi Mexhiti.
Ky investim është pjesë e projekteve të shumta që Ministria e Mjedisit Jetësor dhe Planifikimit Hapësinor dhe Qeveria ka planifikuar për të përmirësuar jetën e qytetarëve në Komunën e Çairit dhe komunat tjera.
