Zëvendëskryeministri i Parë dhe Ministër i Mjedisit Jetësor, njëherësh kandidat për kryetar të Komunës së Çairit, z. Izet Mexhiti, ka ndjekur sot nga afër punimet infrastrukturore në Rrugën
“Jashar Erebara”, në lagjen Gazi Babë të Çairit.
“Si në çdo pjesë të Çairit, edhe këtu po investojmë për të përmirësuar
kushtet e jetesës së qytetarëve. Afro 3 milion denarë janë ndarë për
realizimin e një projekti të rëndësishëm që përfshin: ndërtimin e
rrjetit të ri të ujësjellësit, kanalizimin atmosferik dhe fekal, si dhe
instalimin e ndriçimit rrugor modern”, deklaroi Mexhiti gjatë
inspektimit.
Ai theksoi se pas përfundimit të të gjitha punimeve nëntokësore, rruga
do të asfaltohet tërësisht, duke siguruar infrastrukturë të re dhe
funksionale për banorët.
“Ky është një projekt në kuadër të planit të përgjithshëm të zhvillimit
infrastrukturor të Komunës së Çairit. Po investohet në mënyrë të
koordinuar – me mjete të Komunës, të Ministrisë së Mjedisit Jetësor dhe
të Qeverisë”, tha Mexhiti.
Punimet në Rrugën “Jashar Erebara” po zhvillohen me një dinamikë të
mirë, dhe përfundimi i tyre pritet së shpejti. Ky investim pritet të
ketë ndikim të drejtpërdrejtë në përmirësimin e cilësisë së jetës së
banorëve, si dhe në zhvillimin urban të lagjes Gazi Babë.
