Kandidati për kryetar të Komunës së Çairit nga VLEN, Izet Mexhiti, reagoi sot ashpër ndaj mënyrës se si ish-ministri Bujar Osmani ka menaxhuar fondet publike, duke paralajmëruar se keqpërdorimet dhe çmimet artificialisht të fryra në tenderë paraqesin rrezik të madh për çdo institucion dhe për buxhetin e qytetarëve.
“Nëse vetëm e imagjinojmë që me këto çmime, me këto skema zhvatjeje, Bujari do ta kosiste barin në Çair njësoj si në sallën ‘Boris Trajkovski’, atëherë është e qartë se buxheti i komunës do të shterej për një javë. Me një menaxhim të tillë të papërgjegjshëm, mësuesit do të mbeteshin pa paga, e qytetarët pa shërbimet më elementare”, deklaroi Mexhiti sot për mediat.
Ai iu referua raportit më të fundit të Entit Shtetëror të Revizionit, i cili konstaton keqpërdorime serioze në organizimin e një samiti dyditor, për të cilin janë shpenzuar rreth dy milionë euro nga paratë publike.
“Këtu nuk bëhet fjalë për fjalët e mia apo për akuza politike. Këtu flasin faktet, dokumentet dhe raportet zyrtare. Dhe kur një ministër shpenzon dy milionë euro për një samit dyditor, ndërkohë që qytetarët vuajnë për infrastrukturë, për arsim dhe për kushte bazike jetese – kjo është e pafalshme,” theksoi Mexhiti i cili gjatë ditës së sotme vizitoi ShF. “Vasill Gllavinov”.
Ai kujtoi gjithashtu kohën kur Osmani ishte ministër i Shëndetësisë, duke përmendur se në spitalin Gjinekologjik të Çairit, kishte marrë nofkën “pacienti” – një simbolikë, siç tha ai, që tregon më së miri dështimin e tij në drejtimin e institucioneve.
Mexhiti u shpreh se Çairi ka nevojë për një qeverisje transparente, me investime reale dhe me kujdes të vërtetë për qytetarët – jo për keqpërdorime e tenderë të manipuluar.
“Qytetarët kanë të drejtë të dinë se ku përfundojnë paratë e tyre. Detyra ime si kryetar i ardhshëm është t’ua kthej besimin dhe ta mbroj buxhetin e Çairit nga keqpërdorime të tilla,” përfundoi Izet Mexhiti.
