“Mendoj që qytetari vetë do të vlerësojë. Osmani dhe Grubi ishin tetë
vite në qeveri dhe nuk ka asnjë projekt për Çairin. Nuk mund të thonë që
kanë realizuar qoftë një projekt të vetëm, një të mirë për Çairin.
Përkundrazi, në 15 muajt sa unë isha zëvendëskryeministër, kemi alokuar
100 milionë euro investime për këtë komunë”, deklaroi kandidati i VLEN
për Komunën e Çairit Izet Mexhiti në emisionin “Hajde Flasim” në TV21.
Mexhiti përmendi disa nga projektet konkrete që kanë nisur gjatë
mandatit të tij:
Kampusi Universitar “Nënë Tereza”, projekt i filluar;
Sheshi “Skënderbeu” dhe Çarshia e Vjetër, investim prej 25 milionë
eurosh, në procedurë, me gurëthemel që pritet për dy-tre javë.
Ai më tej iu përgjigj edhe kritikave të Osmanit.
“Dëgjova që kjo qenka ‘keqpërdorim i qeverisjes’. Në fillim thoshin që
ne nuk kemi peshë në qeveri, tash thonë që po e keqpërdorim qeverisjen.
Nëse këto investime quhen keqpërdorim, atëherë unë them se do ta
‘keqpërdorim’ edhe më shumë këtë qeverisje, por vetëm në interes të
qytetarëve”, theksoi Mexhiti.
