Sot pata kënaqësinë të pres në një takim pune ambasadorin e Mbretërisë së Spanjës në vendin tonë, Sh.T. Rafael Soriano Ortiz.
Ambasadorin Ortiz e informova për prioritetet e qeverisë dhe të Ministrisë së Mjedisit, si dhe diskutuam mundësitë për përshpejtimin e procesit të integrimit në Bashkimin Evropian.
Dy vendet tona kanë marrëdhënie diplomatike 30-vjeçare, të bazuara në bashkëpunim të shumëanshëm dhe respekt të ndërsjellë, ndërsa Spanja zbaton një politikë evropiane që ka si komponentë thelbësore zgjerimin e familjes evropiane me synim krijimin e një hapësire të përbashkët rregullash dhe vlerash që do të sigurojnë mirëqenien e qytetarëve tanë.
Në kuadër të bashkëpunimit dypalësh me Mbretërinë e Spanjës, Qeveria Spanjolle ofroi asistencë teknike me grant prej afro 1 milion euro, për shërbime konsulence dhe inxhinierike për sistemin e kullimit dhe trajtimit të ujërave të zeza për liqenin e Ohrit, për të cilën mbështetje e falënderova.
