‘Bastoni, i përzgjedhuri’-fotoja e mbrojtësit të Interit ka pushtuar faqen e parë të të përditshmes spanjolle ‘Sport’ pasi sipas saj është pikërisht futbollisti i Interit objektivi kryesor i skuadrës së Hansi Flick për të përforcuar akoma më shumë mbrojtjen.
E përditshmja katalanase që është një media shumë pranë Barcelonës, shkruan se drejtuesit blaugrana dhe trajneri gjerman, janë plotësisht në një linjë me përforcimet që duhen bërë për sezonin e ardhshëm dhe futbollisti zikaltër është një prej tyre dhe tashmë kanë nisur lëvizjet për të bërë tentativën për ta sjellë atë në Spanjë.
Interesimi i Barcelonës për Bastonin që vlerësohet edhe për aftësitë e tij për t’u pozicionuar, nuk është diçka e kohëve të fundit; emri i tij është prej kohësh në listën e dëshirave të klubit katalanas dhe gjysmëfinalja e Ligës së Kampioneve të sezonit të kaluar i bindi akoma më shumë spanjollët për ta vënë atë në krye të listës së objektivave të merkatos.
Gjithnjë sipas të përditshmes ‘Sport’ ka pasur një kontakt mes palëve në muajin nëntor të vitit të kaluar kur Deco udhëtoi drejt Milanos për të takuar përfaqësuesit e futbollistit dhe për të parë sesa i disponueshëm ishte ai për të lënë Interin me të cilin ka një kontratë deri në 2028.
Dhe mesa duket ndjesitë kanë qenë pozitive me Bastonin që nuk ia mbylli derën opsionit Barcelonë. Tani pas disa muajsh te kampionët e Spanjës është rritur bindja se në fund futbollisti nuk do t’i rezistojë tundimit blaugrana. Qendërmbrojtësi italian nuk i refuzon katalanasit në mënyrë kategorike dhe pas polemikave të fundit të ndeshjes Inter-Juventus, me pasojë kontestimin e marrë në çdo stadium ku hyn, mund ta kenë bërë të mendojë për një ndryshim ambienti.
Barcelona ia ka bërë të ditur Bastonit që e konsideron një prioritet absolut për sezonin e ardhshëm dhe i ka komunikuar synimin për të hapur tratativat që pas pauzës së kombëtareve. Interi e vlerëson futbollistin me rreth 60 milionë euro ndërsa Barcelona sipas ‘Sport’ po përgatisin një propozim që përfshin edhe një futbollist në operacioni dhe emri që ngjall më shumë interes të zikaltrit është ai i Gerard Martin të pëlqehet edhe nga Milani. Por klubi spanjoll nuk ka ndërmend të privohet prej tij. Gjithsesi në Spanjë janë gati për ofensivën për Bastonin.
