Rregullorja për mbrojtje nga zjarret është aq rigoroze, sa që Dekani i Fakultetit të Ndërtimtarisë, Goran Markovski, vlerëson se nëse zbatohet ajo, 80 për qind e objekteve duhet të mbyllen. Ai nënvizoi se nëse gjithçka do të ndërtohej në përputhje me ligjet, rregulloret dhe standardet në fushën e ndërtimtarisë, e veçanërisht në pjesën e mbrojtjes nga zjarret, nuk do të ndodhin tragjeditë. Në intervistë për Radion Evropa e Lirë, ai thekson se në Maqedoninë e Veriut nuk ndërtohet sipas standardeve për shkak të “shoqatave kriminale” të cilat përfitimin financiar e vënë përpara cilësisë. Se kush bën pjesë në këto “shoqata kriminale”, Markovski thotë:
“Shumë, varësisht se për çfarë objekti bëhet fjalë. Shumë persona bëjnë pjesë, duke filluar nga njerëz shumë të afërt pranë krerëve të pushtetit, e deri te ato eshalonët më të ulëta të shërbimeve në institucionet shtetërore, në komuna dhe kështu me radhë. Secili e gjen vendin e vet në atë “shoqatë” dhe secili e ka një çmim të caktuar. Në këtë mënyrë kemi cilësi të dobët, objekte të rrezikshme që, kuptohet, jo gjithmonë, por kohë pas kohe, do të nxjerrin në pah atë se si është ndërtuar brenda, Gjithë ajo cilësi e dobët, gjithë ajo shkujdesje, gjithë ai improvizim dhe sigurisht gjithçka për të cilën është paguar ilegalisht, do të shkaktojë një zjarr kaq evident që mori jetë 59 të rinjsh”, tha Goran Markovski, Dekan i Fakultetit të Ndërtimtarisë.
Markovski thotë se standardet që Evropa i zbaton nga viti 2010, dhe janë zyrtare nëpër vendet e BE-së, ndërsa janë pranuar edhe nga vendet që nuk janë anëtare, tek ne assesi të pranohen.
“Disa pëlqejnë t’i përgjigjen pyetjes se ndërtimi po shkon mirë tani. Po, ndërtimi po ecën mirë tani, po ndërtohet më mirë se çfarë po ndërtohej para tërmetit në Shkup, por është larg të qenit i mirë dhe respektimi i standardeve dhe rregullave që duhet të respektohen në ditët e sotme. Jemi larg kësaj, kemi rezistencë ndaj pranimit të standardeve evropiane në projektim. Ne i shtyjmë me këmbëngulje dhe fatkeqësisht kjo është me kërkesë të inxhinierëve”, shtoi ai.
Markovski thotë se roli i inspektorëve të ndërtimit është që me inspektim real dhe në kohë të parandalojnë fatkeqësi të tilla. Ai tha se në vend ka numër të vogël të inspektorëve të ndërtimit, ndërsa nënvizoi se në mjedise të mëdha si Shkupi, ata mund të numërohen me gishta të njërës dorë./Alsat.mk
