Kylian Mbappe e fitoi mbrëmë çmimin “Lojtari më i mirë i vitit” në Francë, për herë të pestë në karrierën e tij.
Ylli francez u shpreh i lumtur me çmimin e fituar pasi shkëlqeu në Ligue 1 në këtë edicion me Paris Saint-Germainin.
Por, ajo që iu interesoi më shumë të pranishmëve ishte e ardhmja e nënkampionit botëror.
Përfaqësuesi francez ditë më parë e zyrtarizoi largimin nga PSG-ja në fund të këtij sezoni, kur edhe do t’i skadojë kontrata natyrale.
Por, ish-futbollisti i Monacos nuk e ka bërë të ditur ende klubin e ri, ndonëse të gjitha rrugët në këtë aspekt çojnë në Madrid, ku e pret Reali krahëhapur.
“Kur do ta zbuloj klubin tim të ri? Në jetë duhet të marrësh kohë për gjithçka. Gjëja e vetme për ta ditur është se do të largohem nga PSG-ja. Për pjesën tjetër ndoshta nuk është momenti i duhur për ta zbuluar”, deklaroi Mbappe për mediumin francez “RMC Sport”.
Sidoqoftë, ai pritet ta zyrtarizojë klubin e ri në ditët apo në javët në vazhdim.
Atë që nuk e bëri Mbappe mbrëmë, sot e bëri Javier Tebas, president i La Ligas, i cili “e zyrtarizoi” para kohe transferimin e yllit francez në Real Madrid.
“Mbappe do të vijë në Madrid nga sezoni i ardhshëm. Është njëri prej lojtarëve më të mirë në botë, por janë edhe Vinicius e Bellingham. Reali do ta ketë një skuadër të madhe. Është e qartë se kjo nuk jep garanci për ta fituar kampionatin”, deklaroi Tebas.
