Ministria e Arsimit dhe Shkencës ka reaguar ndaj konferencës për media të LSDM-së opozitare, nga ku, sipas ministrisë, me të njëjtat komunikata të vitit të kaluar, të kopjuara, po tentohet të zhvlerësohet diçka që tani është bërë mirë, por që ka qenë detyrë e tyre gjatë shtatë viteve të fundit. “Për fat të keq, katër ministra të tyre nuk arritën të sigurojnë libra të rinj, as të përmirësojnë ditarin elektronik me të cilin mësimdhënësit patën sfida të mëdha deri në këtë vit shkollor,” thekson MASH-i.
“Ju informojmë se ka libra për të gjithë nxënësit. Ministria e Arsimit dhe Shkencës këtë vit e shtypi të gjithë tirazhin e kërkuar nga shkollat, përmes aplikacionit elektronik të posaçëm për porositjen e sasisë së librave. Janë shtypur tekstet e miratuara më herët për të gjitha lëndët, librat e rinj për klasën e shtatë dhe për vitin e parë të gjimnazit, si dhe librat e rinj për gjuhët e huaja që mungonin prej shtatë vitesh. Pjesa më e madhe e tirazhit, mbi 90 për qind, tashmë është shpërndarë, ndërsa distributorëve u nevojiten edhe disa ditë për ta përmbyllur plotësisht furnizimin. Më tej, planin për ndarjen e librave te nxënësit e bëjnë drejtuesit e shkollave dhe stafi i tyre,” shtohet në reagim.
Në lidhje me ditarin e ri elektronik, ministria informon se ai është përgatitur me mbështetje të Bashkimit Evropian përmes fondeve IPA, është testuar bashkë me përdoruesit dhe “funksionon në mënyrë të shkëlqyer”. Në sistem janë të regjistruar mbi 250 mijë përdorues – mësues, kujdestarë klasash, drejtorë dhe administratorë. Janë futur mbi 90% e të dhënave për vitin shkollor 2025/2026. Janë krijuar mbi 15 mijë paralele dhe kujdestarët kanë futur më shumë se 3 mijë orare. Po ashtu, të dhënat nga sistemet e vjetra janë transferuar në sistemin e ri, njofton MASH.
“Që nga fillimi i përdorimit, nuk ka pasur asnjë sfidë, ndërsa ministria është vazhdimisht në dispozicion për çdo lloj ndihme teknike dhe për përdoruesit, përmes e-mailit zyrtar,” theksohet më tej.
Funksionaliteti i ditarit elektronik, sipas ministrisë, mund të verifikohet shumë lehtë nga çdo qytetar, elektronikisht në linkun https://ednevnik.edu.mk. “Lehtësisht mund të kontrollojë edhe LSDM-ja. Por dhembja e tyre është dështimi i viteve të kaluara që i çoi në opozitë, ndaj bëjnë akuza të tilla të pavend për të krijuar përshtypjen se të gjithë janë si ata. Kujtojmë se gjatë mandatit të qeverisë së kaluar janë ndërruar katër ministra të arsimit, dhe asnjëri nuk siguroi libra e as nuk aktivizoi një ditar elektronik funksional,” thekson ministria.
