Kosovë

Masa e përkohshme për Kuvendin përfundon sot, sytë nga Kushtetuesja

30 ditë, e hiç më shumë. Ky është afati që Gjykata Kushtetuese e Kosovës ua ka vendosur deputetëve për konstituimin e Kuvendit, proces i cili ka nisur që nga 15 prilli.

Numërimi mbrapsht për deputetët e legjislaturës së 9-të të Kuvendit të Kosovës nisi nga e enjtja e 26 qershorit, kur u publikua ky aktgjykim.

Pas përfundimit të këtij afati, Kushtetuesja mori një vendim për masë të përkohshme deri me 8 gusht, duke ua ndaluar deputetëve marrjen e çdo vendimi deri me këtë datë.

Sot pritet publikimi i një aktgjykimi të ri, që mund të përcaktojë hapat e ardhshëm drejt zhbllokimit të procesit.

Kryeministri në detyrë, Albin Kurti, ka bërë të ditur se Lëvizja Vetëvendosje do ta zbatojë vendimin e gjykatës, pavarësisht se cili do të jetë epilogu. “Është dëmtim i madh që Kosova nuk ka Kuvend”, ka theksuar ai.

Kriza institucionale ka hyrë në muajin e gjashtë pas zgjedhjeve të 9 shkurtit.

Që nga seanca e parë më 15 prill janë bërë 54 përpjekje për zgjedhjen e kryetarit të Kuvendit, por asnjëra nuk ka pasur sukses.

Vetëvendosje, megjithëse partia fituese me 48 ulëse, nuk ka arritur të sigurojë shumicën e nevojshme prej 61 votash për kandidaten e saj, Albulena Haxhiun.

Presidentja Vjosa Osmani ka zbuluar se kishte kërkuar nga Kushtetuesja sqarime mbi pasojat në rast të moskonstituimit brenda afatit, por e ka tërhequr kërkesën kur mori vesh se gjyqtari serb Radomir Llaban ishte caktuar si raportues i çështjes.

Sipas saj, Llaban paraqet “rrezik për sigurinë kombëtare”, bazuar në informacione të klasifikuara nga Agjencia e Kosovës për Inteligjencë dhe institucionet tjera të sigurisë.

Related Posts