E udhëhequr nga trajneri i ri Goce Sedlloski, përfaqësuesja e Maqedonisë në futboll sonte në Kopenhagë do të përballet me Danimarkën në gjysmëfinalen e play-off-it për kualifikim në Kampionatin Botëror 2026, përcjell TV21.
“Ky është një moment i madh për të gjithë ne. Kemi shansin të luftojmë për një vend në Botëror dhe kjo është motivi që bashkon gjithë vendin. Danimarka është një kundërshtar cilësor dhe i respektuar, por edhe ne jemi këtu me një arsye. Në ekip shoh energji, përqendrim dhe dëshirë. Lojtarët e kuptojnë rëndësinë e fanellës dhe besoj se kjo do të shihet në fushë. Jemi të përgatitur taktikisht, e dimë çfarë duam të luajmë, edhe pse vendimi për formacionin dhe përbërjen mbetet tek unë”, deklaroi Sedloski mbrëma në konferencën për shtyp.
“I kemi analizuar mirë dhe kemi përgatitur çdo detaj. Jemi të vetëdijshëm kundër kujt luajmë dhe çfarë na pret, por edhe ne kemi atributet tona të forta. Nga ndeshjet e mëparshme kemi nxjerrë mësime të rëndësishme dhe ato na kanë ndihmuar të përmirësohemi si ekip. Lojtarët e rinj janë integruar shkëlqyeshëm dhe atmosfera në ekip është në një nivel të lartë, funksionojmë si një tërësi. Në ndeshje të tilla motivimi kurrë nuk mungon. Nënvlerësimi na motivon edhe më shumë. Mbështetjen e tifozëve gjithmonë e ndjejmë dhe do të japim gjithçka nga vetja për t’i bërë krenarë”, tha kapiteni Enis Bardhi.
Danimarka hyn në ndeshje si favorite kryesore, por futbollistët tanë premtojnë përkushtim maksimal për të surprizuar kundërshtarin cilësor.
Fillimi i ndeshjes në Kopenhagë është caktuar për orën 20:45. Të gjitha biletat në stadiumin “Parken” janë shitur, kapaciteti është për 38 mijë persona, ndër ta do të jenë rreth një mijë tifozë nga Maqedonia.
Fituesi i këtij dueli, në finalen e play-off-it më 31 mars, do të përballet me fituesin nga dueli Çeki – Irlandë.
