Ministri i Jashtëm i SHBA-së Rubio pas bisedimeve me përfaqësuesit e Ukrainës, të SHBA-së dhe Europës në Gjenevë lidhur me planin për t’i dhënë fund luftës sulmuese ruse shprehet “shumë optimist”.
Gjatë bisedimeve në Gjenevë lidhur me planin e SHBA-së për t’i dhënë fund luftës në Ukrainë, sipas të dhënave të ministrit të Jashtëm të SHBA-së, Marco Rubio ka pasur “përparime të mëdha”. Është përpiluar një dokument bazë dhe janë kufizuar disa pika të diskutueshme, tha Rubio në një konferencë shtypi (23.11.2025) pas bisedimeve me përfaqësuesit e Ukrainës.
Dokumenti është duke u përpunuar vazhdimisht. Ai tha, se është “shumë optimist”, që “shumë shpejt” do të mund të arrihet një dakordësim. “Sot ishte dita më produktive, që kemi pasur deri tani”, tha kryediplomati i SHBA-së.
Sa u përket çështjeve të hapura ato kanë të bëjnë p.sh. me rolin e ardhshëm të BE-së dhe të NATO-s si dhe se çfarë garancie sigurie do t’i jepen Ukrainës. Të tjera detaje Rubio nuk donte të përmendte, pavarësisht se disa herë iu shtrua kjo pyetje. Por asnjëra nga çështjet e pasqaruara nuk është e pakapërcyeshme, tha Rubio. Disa çështje janë me karakter semantik, të tjera kanë të bëjnë me nivelet e larta të vendimmarrjes.
Lidhur me ecurinë e mëtejshme Rubio tha, se: “Në fund duhet të miratojnë presidentët tanë, por jam me shumë besim, se kjo do të ndodhë, nisur nga përparimet, që kemi arritur.” Edhe pala ruse duhet ta miratojë planin. I pyetur nëse ka një deadline, ministri i Jashtëm i SHBA-së u përgjigj vakët: Dëshirohet në rastin ideal deri të enjten të arrijhet në një përfundim – ndoshta edhe më përpara ose më vonë, tha Rubio.
