Sindikalistët përsëri do të protestojnë nesër, duke bllokuar Kuvendin, pasi deputetët, siç thonë ata, nuk kanë reaguar ndaj propozimit për rritjen e pagës minimale dhe e kanë bllokuar ligjin.
Protestuesit do të vendosen në të dyja hyrjet e Kuvendit, ku do të ketë të paktën nga 21 persona, për të mos lejuar deputetët të hyjnë me makina.
Sipas kreut të LSM-së, çdo familje është varfëruar për 9.500 denarë brenda një viti.
“Deputetët ende bëhen të shurdhër e të verbër ndaj nismës së Lidhjes së Sindikatave për rritjen e pagës minimale dhe të pagave të tjera të punëtorëve. Ata bëhen të shurdhër e të verbër edhe ndaj nismës së fundit të LSM-së për uljen e pagave të tyre për 80% ose për ta ulur bazën e përllogaritjes së pagave nga mesatare në minimale, që edhe ata të arrijnë në minimale, e pastaj të flasin sa mirë është të jetosh me pagë minimale në Maqedoni, si dhe të ulin koeficientet e tyre”, tha Sllobodan Trendafilov, kryetar i Lidhjes së Sindikatave të Maqedonisë.
Sindikatat do të vazhdojnë protestat edhe të enjten me bllokimin e Odës Ekonomike, ndërsa javën e ardhshme, kanë paralajmëruar bllokadë edhe të Qeverisë.
Kërkesa e tyre kryesore mbetet rritja e pagës minimale në 600 euro. Ndërkohë, një ditë më parë Qeveria dhe sindikatat arritën marrëveshje për rritjen e pagave në administratën e gjyqësorit. Me marrëveshjen, mbi 11.000 të punësuar do të marrin 40 për qind rritje gjatë tre viteve. / Alsat.mk
