Politikat e qeverisë së Mickoskit duke negociuar çmimet për të ashtuquajturat “Shporta e Vitit të Ri” nuk do të ketë efektin e dëshiruar dhe nuk do të ulë realisht çmimet e larta, thonë nga LSDM.
Nga atje thonë se çmimet e disa prej produkteve që janë publikuar në këtë shportë në ditët e kaluara kanë shënuar rritje, sidomos të produkteve të qumështit. Tregtarët kanë hapësirë të tillë për rritjen e çmimeve në ditët në vijim deri më 15 dhjetor. Pra, nëse më vonë reduktohen në të njëjtin nivel, nuk do të thotë më shumë para për qytetarët, por manipulim klasik dhe efekti në xhepat e popullit është zero, pretendon LSDM.
“Për më tepër, qytetarët kanë nevojë për masa për uljen e përhershme të kostove, jo vetëm për një periudhë të shkurtër. Përveç kësaj, masa ka një të metë sistematike, qeveria nuk ka mekanizëm për kontroll apo ndëshkim nëse nuk respektohet marrëveshja.
Një masë tjetër me efekt 0.1% si ajo e mëparshmja nuk është zgjidhje në kushtet kur çmimet janë në rritje dhe më tej, vlera e shpenzimeve mujore të qytetarëve po rritet. Qytetarët kanë nevojë për masa të qëndrueshme dhe të mirëmenduara që do të kenë rezultat real dhe do të çojnë në ulje reale të çmimeve.
Një masë reale që do të sjellë ulje reale dhe afatgjatë të çmimeve të produkteve është vendimi i LSDM-së për heqjen e TVSH-së për ushqimet. Me heqjen e TVSH-së për ushqimet qytetarët përfitojnë më së shumti, çmimet e 250 produkteve do të ulen menjëherë dhe realisht. Tregtarët do ta respektojnë plotësisht masën dhe qytetarët realisht do të kursejnë mbi 2000 denarë në muaj.
Heqja e TVSH-së për ushqimet është një masë afatgjatë, do të zgjasë dhe qytetarët do t’i ndjejnë efektet për një vit të tërë, për të cilën kanë shumë nevojë”, shtojnë nga LSDM.
