Lidhja e Sindikatave të Maqedonisë kërkon që paga minimale të rritet për 6000 denarë dhe bashkë me të, të rriten edhe të gjitha pagat e tjera në sektorin publik dhe privat, shkruan Alsat.
Sipas sindikalistëve, paga minimale duhet të jetë rreth 500 euro, ndërsa për kontributet, shteti t’i lirojë apo t’i subvencionojë për 12 muaj.
Lidhja e Sindikatave kërkon që Qeveria dhe deputetët të mbështesin propozimet e tyre. Ndërkohë nëse nuk ka marrëveshje, nuk e përjashtojnë mundësinë e grevës së përgjithshme.
“Nëse dikush vendos të bëhet i pafytyrë do të jemi dyfish i pafytyrë. Nëse dikush vendos në mënyrë të njëanshme ta hedh poshtë nismën apo propozimin për ruajtjen e standardit jetësor të punëtorëve, kuptohet se në mënyrë të njëanshëm mund të marrim vendim edhe për grevë”, tha Sllobodan Trendafillov, Kryetar i Lidhjes së Sindikatave.
Lidhja Social Demokrate mbështet kërkesat e Sindikalistëve.
“E mbështesim luftën e sindikatave, për pagë minimale 500 euro. Njëkohësisht e shihni se të gjitha masat tona ekonomike që i kemi propozuar në periudhën e kaluar dhe sot shkojnë në interes të rritjes së pagave për qytetarët, respektivisht për punëtorët”, tha Sanja Llukarevska, LSDM.
Sindikalistët kërkesën për rritjen 6000 denarëshe e mbështesin në rritjen e kostos së jetesës duke nënvizuar se rritja e minimales në 24 400 denarë, siç është paraparë në pajtueshmëri me harmonizimin ligjor, është rritje shumë e vogël.
Paga minimale aktualisht është 22. 567 denarë dhe duhet të harmonizohet këtë muaj. Për lartësinë e pagës minimale duhet të flitet në seancën e këshillit ekonomiko-social që duhet të mbahet në mesin e këtij muaji. / Alsat.mk
