Udhëheqës fetarë e politikë botërorë kanë përcjellë mesazhe reflektimi, shprese dhe paqeje me rastin e ndërrimit të viteve, duke bërë thirrje për solidaritet, stabilitet dhe një të ardhme më të sigurt në vitin 2026.
Në audiencën e fundit për vitin 2025, Papa Leo XIV, në mesazhin e tij drejtuar besimtarëve, i ftoi ata të shprehin mirënjohje për vitin që po mbyllet, të kërkojnë falje dhe t’ia besojnë rrugëtimin e së ardhmes mëshirës së Zotit.
Duke rikujtuar fjalët e Shën Palit VI se “Zoti është dashuri”, Papa theksoi se fundi i vitit është një moment reflektimi mbi gëzimet dhe vuajtjet e përjetuara. Ai përmendi pelegrinazhet e shumta gjatë Vitit Jubilar, por edhe humbjen e Papa Françeskut, si dhe luftërat që vazhdojnë të shkatërrojnë botën.
Papa Leo XIV nënvizoi se Kisha i fton besimtarët t’i vendosin të gjitha përjetimet para Zotit, duke kërkuar që edhe në vitin e ri të ripërtërihen mëshira dhe shpresa. Viti u mbyll me këndimin solemn të “Te Deum”, si shprehje falënderimi dhe lavdie, jo në kuptim tokësor, por si akt i sinqertë besimi.
Mesazh për Vitin e Ri ka dhënë edhe presidenti i Turqisë, Rexhep Taip Erdogan, i cili uroi stabilitet dhe paqe në rajon.
“Kombi im i dashur, ju përshëndes të gjithëve me ndjenjat e mia më të sinqerta, me respekt dhe dashuri. Sot i japim lamtumirën vitit 2025 dhe po përgatitemi ta mirëpresim vitin 2026 me shpresa të reja dhe qëllime të reja. Uroj që viti i ri të sjellë mirëqenie dhe të mira për vendin tonë, kombin tonë, hapësirën tonë më të gjerë shpirtërore dhe për mbarë njerëzimin”, ka thënë presidenti turk.
Ndërkohë, kancelari gjerman Friedrich Merz, në fjalimin e tij të parë për Vitin e Ri si kancelar, bëri thirrje për besim dhe siguri pavarësisht tensioneve të shumta ndërkombëtare. Merz foli për luftën në Ukrainë, zhvillimet e brendshme politike dhe për vitin 2026, të cilin e cilësoi si një vit që mund të shënojë rikthimin e paqes, lirisë dhe prosperitetit.
Mesazh për Vitin e Ri ka dhënë edhe presidenti i Kinës, Xi Jinping, i cili tha se viti 2026 shënon fillimin e Planit të 15-të Pesëvjeçar. Sipas tij, gjatë kësaj periudhe Kina duhet të ndërmarrë hapa të fuqishëm për zhvillim me cilësi të lartë, thellim të reformave dhe hapje të mëtejshme në të gjitha fushat. Xi Jinping shtoi gjithashtu se, sipas tij, “trendi i ribashkimit të Kinës nuk mund të ndalet”.
