Glauk Konjufca është mandatuar të martën nga presidentja Vjosa Osmani për formimin e Qeverisë së Kosovës.
Presidenca e Republikës së Kosovës kishte njoftuar se veprimi u bë në përputhje me nenin 95, paragrafi 4 të Kushtetutës, i cili përcakton kompetencat e Presidentit për emërimin e mandatari për qeverinë e re.
Kurse, Presidentja Osmani i ka uruar Konjufcën suksese në këtë detyrë të rëndësishme.
“Sot, në përputhje me nenin 95, paragrafin 4 të Kushtetutës së Republikës së Kosovës, Presidentja Vjosa Osmani ka mandatuar z. Glauk Konjufca, mandatar për formimin e Qeverisë së Republikës së Kosovës.
Presidentja Osmani i ka uruar suksese z. Konjufca”, njoftimi i Presidencës.
Në anën tjetër, Glauk Konjufca, pasi u zgjodh mandatar ka thënë se nuk synon të bëjë marrëveshje koalicioni me partitë opozitare, por një bashkëpunim në mënyrë që Kosova të dalë nga kriza politike.
“Nuk do të jetë një proces në të cilin ne do të kërkojmë ndonjë marrëveshje koalicioni me partitë politike, ideja ka qenë me kriju një qeveri të re me shmang zgjedhjet e menjëhershme dhe të provojmë të bashkëpunojmë me partitë politike parlamentare për ta miratuar buxhetin 2026”, ka thënë Konjufca pas mbledhjes së Këshillit të Përgjithshëm të LVV-së ku u propozua për mandatar.
Ai shtoi se ka pranuar një gjë të tillë për shmangien e zgjedhjeve të reja.
“Unë e pranova dhe e tëra që na mbetet është të shohim veprimin e presidentes së Republikës. Unë e thash nëse kjo nuk shmanget atëherë Kosova mund të ketë 5 palë zgjedhje brenda një viti, dhe kostoja është 40 milionë euro. Për t’i shmangur këto, kështu e definova pse është interes publik të shtetit të Kosovës, sepse ta keni parasysh se kur të arrijmë te momenti i presidentit nuk është i sigurt se një parlament i ardhshëm mund ta zgjidhë dhe prapë mund të kemi zgjedhje”, u shpreh Konjufca.
Ish-kryeparlamentari i Kuvendit theksoi se për të shmangur dy palë zgjedhje, maturia shtetërore në këto rrethana dhe moment është që të kemi një qeveri së paku deri në zgjedhjen e presidentit të ri të vendit dhe se kjo do ta përfshinte edhe buxhetin.
“Nevojitet konsensus i të gjitha forcave. Besoj se do të reflektojnë opozita dhe do ta kemi bashkëpunimin pozitiv që këto dy gjëra të ndodhin, që të shmangen zgjedhjet në dhjetor dhe votimi i buxhetit. Do ta kërkoj bashkëpunimin, por jo për qeveri me koalicione, por t’i thirrin mendjes që këto gjëra të kalojnë e pastaj bëjmë bash çka të duam”, tha Konjufca.
Në anën tjetër, analistët politikë konsiderojnë se Konjfuca është emër i duhur dhe më i mirë i mundshëm, por shprehin skepticizëm për sigurimin e 61 votave.
Opozita në pozitë të pafavorshme
Analisti politik Adnan Qaka, thotë se Kurti ka përdorur situatën për të testuar koherencën politike të opozitës dhe për të përfituar politikisht.
Sipas tij, ky veprim rrit kapitalin politik të Kurtit dhe partisë së tij.
“Vendimi i Lëvizjes Vetëvendosje për ta propozuar Glauk Konjufcën si mandatar për kryeministër përfaqëson një lëvizje të qartë taktike nga kryeministri aktual, Albin Kurti. Ai nuk propozoi një kandidat tjetër, por pikërisht Konjufcën – personin për të cilin më herët opozita kishte deklaruar se do ta votonte në rast se do të propozohej për kryeparlamentar. Ky veprim vendos opozitën në një pozitë të pafavorshme politike, pasi që ajo me ngulm kishte deklaruar se nuk do ta votonte Albin Kurtin, të cilin e konsideron si “të keqen më të madhe të shtetit”. Në këtë mënyrë, Kurti e ka përdorur situatën për të testuar koherencën politike të opozitës dhe për të përfituar politikisht, edhe pse është i vetëdijshëm se kandidatura e Konjufcës nuk do të marrë mbështetjen e nevojshme për t’u zgjedhur kryeministër. Ky veprim i tij, në thelb, e rrit kapitalin politik të Kurtit dhe të partisë së tij, duke i pozicionuar ata si palë që e ruan iniciativën dhe që sfidon opozitën në mënyrë të zgjuar”, deklaron Qaka.
Sipas tij, gjasat janë minimale që Konfjuca t’i sigurojë 61 votat e nevojshme.
Ai konsideron se opozita rrezikon të bie në kontraditë, për shkak se dikur pranonte Konjufcën kryeparlamentar, ndërsa tani refuzon ta pranojë në pozitën e kryeministrit.
“Dihet se Glauk Konjufca është figurë e afërt politike me Albin Kurtin, pjesë e brezit të parë që iu bashkua Lëvizjes Vetëvendosje. Ai është nënkryetar i partisë dhe ka qëndrime të përafërta me liderin e saj. Për këtë arsye, opozita pretendon se zgjedhja e tij do të përfaqësonte një “qeveri të së njëjtës linjë” me atë të Kurtit. Megjithatë, nëse do të bëhej kryeministër, Konjufca do të duhej të demonstronte lidership të pavarur dhe një qasje më autonome në raport me strukturat partiake. Edhe pse PDK dhe AAK më herët kishin shprehur gatishmëri për ta votuar Konjufcën për kryeparlamentar, gjasat që ai të sigurojë 61 votat e nevojshme për t’u bërë kryeministër janë minimale. Kjo për shkak se opozita, për sa kohë Albin Kurti mbetet në krye të Vetëvendosjes, duket e vendosur ta mbajë këtë parti jashtë pushtetit. Madje, disa parti opozitare kanë ushtruar presion të ndjeshëm ndaj deputetëve të tyre që të mos e mbështesin asnjë kandidat të propozuar nga VV-ja, çka e bën edhe më të qartë pozicionin e tyre refuzues. Nga ky këndvështrim, mund të thuhet se opozita rrezikon të bie në kontradiktë: është paradoksale të pranohet një kandidat si “i përshtatshëm” për kryeparlamentar, por të refuzohet po ai kandidat në pozitën e kryeministrit, vetëm sepse propozimi vjen nga e njëjta parti. Ky qëndrim, në thelb, i shërben më shumë interesave të ngushta partiake sesa logjikës demokratike dhe ndërtimit të institucioneve të qëndrueshme”, shton analisti.
Tutje, ai kritikon partitë politike, duke thënë se duhet të konkurrojnë me programe, ide dhe me alternativa të qarta zhvillimore për shtetin dhe jo me akuza, fyerje dhe premtime të parealizueshme.
“Në anën tjetër, retorika e ashpër, arrogante dhe shpesh e ngarkuar me emocione që po manifestohet në debate publike nga disa përfaqësues opozitarë, siç u pa në rastin e zonjës Hikmete Bajrami apo në reagimet e Gazmend Muhaxherit dhe Lutfi Hazirit, nuk i shërben demokracisë. Përkundrazi, ajo e thellon përçarjen dhe dobëson kulturën politike. Në një sistem demokratik, partitë politike duhet të jenë kundërshtare, jo armiq. Ato duhet të konkurrojnë me programe, me ide dhe me alternativa të qarta zhvillimore për shtetin. Fatkeqësisht, që nga paslufta, diskursi politik në Kosovë dominohet nga akuza, fyerje dhe premtime të parealizueshme, ndërsa shumë pak vëmendje i kushtohet ofrimit të alternativave konkrete dhe vizioneve zhvillimore. Edhe gjatë zgjedhjeve të fundit nacionale, programet e shumicës së partive – përfshirë LDK-në dhe PDK-në – përmbanin premtime utopike, jorealiste dhe shpesh në kundërshtim me interesin e përgjithshëm shtetëror. Kjo tregon se sistemi politik në Kosovë ende nuk ka arritur pjekurinë e nevojshme për të ndërtuar një debat të bazuar në ide, fakte dhe politika publike me ndikim afatgjatë. Lëvizja e Albin Kurtit për ta propozuar Glauk Konjufcën si mandatar është një veprim i kalkuluar politikisht, që e ka vënë opozitën në pozitë të vështirë dhe ka forcuar pozicionin e Vetëvendosjes në opinion publik. Megjithatë, pasojat e kësaj dinamike tregojnë edhe një herë nevojën urgjente për maturi politike, dialog institucional dhe konkurrencë programore, si parakushte për një demokraci funksionale në Kosovë”, përfundon Qaka.
Pasi e propozoi për mandatar, kryeministri në detyrë, Albin Kurti ka thënë se ky propozim është bërë për shkak të vlerësimit e besimit ndaj Konjfucës.
“E bëjë këtë propozim jo për të bërë lëshim sepse rregulli i demokracisë thotë që subjektet vendosin vetë e për Lëvizjen Vetëvendosje as nuk vendos dhe as kurrë nuk ka për të vendosur ndonjë subjekt. Megjithatë, pas diskutimesh të zgjeruara e të thelluara në kryesinë e Lëvizjes sonë unë do të propozoj si kryetar i Lëvizjes Vetëvendosje që jam që mandatin e dytë për krijimin e qeverisë t’ia japim nënkryetarit, aktivistit, shokut dhe mikut tonë të afërt dhe fort të besueshëm Glauk Konjufca. Këtë propozim e bëjë për shkak të vlerësimit e besimit që kam dhe që kemi të gjithë ne bashkë tek Glauku, por edhe për shkak që të mos bëhen dy herë zgjedhje edhe në dhjetor edhe në prill. Le të vazhdojmë me kabinetin e njëjtë që kam propozuar unë marr vendin e Glaukut e Glauku timin siç edhe jemi dakorduar mbrëmë në kryesi bashkë. Le të votohet më pas buxheti i shtetit dhe buxhetet komunale, le të votohet plani i rritjes së Bashkimit Evropian për fonde të vlefshme, le të bëhen disa punë të domosdoshme e pastaj shkojmë në zgjedhje”, u shpreh Kurti.
Konjufca emër i duhur dhe propozim i mirë
Ndërsa, analisti Gani Qarri, thotë se vendimi i Kurtit ishte domosdoshmëri e patejkalueshme.
Sipas tij, me këtë vendim Kurti ka dëshmuar se e do më tepër Kosovën sesa postin e kryeministrit.
“Vendimi i kryeministrit në detyrë, z. Albin Kurti për të propozuar Glauk Konjufcën si mandatar të ri për kryeministër, më tepër se lëvizje taktike, ishte një domosdoshmëri e patejkalueshme, akt me të cilin besojë që z. Albin Kurti ka dëshmuar në vepër se më shumë e do Kosovën se sa postin e kryeministrit e madje edhe më shumë se veten e tij, ndaj opozita e cila tash e sa vite bllokon çdo reformë, veçanërisht në drejtësi dhe akuzon në mënyrë arbitrare Albin Kurtin se kinse ai po e “bllokon shtetin”, të paktën kësaj radhe, do duhej të reflektonte, pikërisht për hir të shtetit dhe qytetarëve, ngase vetëm kështu, mendojë se fitojnë të gjithë, e domosdo fiton edhe Kosova. Medoemos duhet cekur faktin, se sikur opozita të tregohej kaq e vendosur edhe kundër ndërhyrjeve të Serbisë në Kosovë, veprimeve kundërligjore e kundër kushtetuese të të ashtuquajturës “listë serbe” dhe agresionit territorial të kryeterroristit Millan Radojçiq, sa po tregohet agresive kundër kryeministrit në detyrë, z. Albin Kurti, shumë akte kundër Kosovës as nga Serbia dhe as sanksionet e BE-së etj, nuk do të kishin ndodhur kurrë kundër Kosovës dhe do të kishim shënuar si shtet i ri, arritje shumë më të mëdha në vend dhe në arenën ndërkombëtare, madje sot mund të ishim pa sanksione të BE-së dhe të anëtarësuar tanimë edhe në Këshillin e Evropës”, deklaron Qarri.
Ai thotë se propozimi i Konjufcës është më i mirë i mundshëm, por opozita rrënon çdo normë të sjelljes që është në interes të shtetit.
“Sidoqoftë, pas mosvotimit të kabinetit qeveritar të paraqitur më 26 tetor nga kryeministri në detyrë z.Albin Kurti, propozimi për kryeministër i z. Konjufca përveçse shihet si propozimi më i mirë i mundshëm dhe kandidati më i preferuar edhe nga subjektet opozitare, që në rrethanat aktuale të krijohet një qeveri qoftë edhe e përkohshme, por legjitime dhe fuqiplotë, si domosdoshmëri, për votimin e buxhetit të shtetit dhe miratimin e marrëveshjes me BE-në e cila në kuadër të planit të rritjes ka vënë në dispozicion për Kosovën mese 882 milion Euro dhe Banka Botërore rreth 100 milion tjera për projekte të reja dhe zhvillim, propozimi i Konjufcës u mirëprit dhe mori mandatin edhe nga Presidentja e Kosovës, si kompromisi më i arsyeshëm, i ardhur në momentin vendimtar dhe shfaqur pikërisht në kohën e duhur, për krijimin e qeverisë dhe institucioneve të reja të dala nga votimet kombëtare të 9 shkurtit. Me një opozitë, e cila e rrënon çdo normë të sjelljes që është në interes të shtetit dhe qytetarëve të Kosovës dhe e ka problem AlbinKurtin, por jo të ashtuquajturën “listë serbe” as veprimet kundërligjore e kundërkushtetuese të saj, e madje as ndërhyrjet e Serbisë, brenda territorit tonë shtetëror, që përveç agresionit territorial më 24 shtator 2023, jo fort moti kidnapoi edhe tre policë tanë brenda kufijve të Kosovës, siç plagosi e kidnapoi së fundi në afërsi të Leposaviqit edhe pjesëtarin serb të Byrosë Kosovare të Sigurimeve, Millan Vukashinoviq, vetëm pse punonte në pikën kufitare të Jarinjës, për të testuar gatishmërinë e Kosovës në sigurinë kufitare dhe dëshmuar edhe me provokimin më të ri, se siguria kufitare me Serbinë mbetet sfidë dhe e cenueshme në vijimësi, derisa opozitarët bëjnë luftë për pozitat personale në kurriz të shtetit, edhe me propozimin e z. Konjufca për kryeministër të ri, shihet publikisht, se Albin Kurti mbetet i vetëm në mbrojtje të shtetit dhe institucioneve të Republikës së Kosovës”, thekson analisti.
Ai dyshon se Konjfuca mund të sigurojë mbështetjen e 61 deputetëve, përkundër që e sheh emër të duhur.
“Andaj megjithëse z. Glauk Konjfuca është emri i duhur dhe propozimi më i mirë i mundshëm i cili ishte pranuar edhe nga vet PDK dhe AAK, për votim si kryeparlamentar, përkundër konstituimit të Kuvendit më 10 tetor, duke parë deklaratat e fundit të opozitarëve nga subjektet e inkriminuara në parlament, që interesat personale dhe ato partiake, vazhdojnë ti vendosin para interesave të vendit, fatkeqësisht Kosova, përveçse tash e mbi 9 muaj vijon të mbetet nën bllokadë të paprecedent politike, me oportunist të tillë që Ramiz Lladrovci do t’i quante të dh… dhe krenarë, krijohet pasiguri dhe dyshime të arsyeshme, që edhe z. Konjufca të mund të sigurojë mbështetjen e 61 deputetëve dhe arrijë krijimin e qeverisë së re legjitime të Republikës së Kosovës, të dal nga legjislatura e zgjedhjeve të 9 shkurtit, që do ta shpëtonte edhe vendin nga mbingarkesat buxhetore me organizimin e zgjedhjeve të reja të jashtëzakonshme parlamentare, të cilat përveç kostos së lartë, mund të krijojnë serish tensione dhe shkaktojnë edhe pasoja enorme politike e kushtetuese, për mbarë vendin dhe Republikën e Kosovës si shtet i ri i pavarur”, përfundon analisti.
