Pas përfundimit të zgjedhjeve lokale, ku AKI-ja pësoi humbje pothuajse në të gjitha komunat shqiptare, ka nisur një valë e re lëvizjesh politike. Mbrëmë, tre figura të reja nga rinia e ASH–Taravarit në Tetovë, Ujkan Rahmani, kryetar i FRASH-it, Ferihane Murtezani, nënkryetare, dhe Safet Asani, gjithashtu nënkryetar, kaluan në kampin politik të udhëhequr nga Izet Mexhiti.
Sipas burimeve të portalit TetovaSot, kjo është vetëm faza e parë e një procesi më të gjerë. Në ditët në vijim priten kalime të tjera të figurave të nivelit më të lartë nga krahu i Taravarit drejt rrethit politik të Arben Fetahut, i cili edhe pse pa një parti të shpallur zyrtarisht, po grumbullon mbështetje brenda strukturave të zhgënjyera të AKI-së.
“Priten emra të rëndësishëm. Nuk dëshirojmë t’i bëjmë publikë për momentin. Ditëve në vijim do të dalin vetë,” thonë burime të besueshme nga ky grup, duke mos përjashtuar as kalime deputetësh në fazën e ardhshme.
Informacionet e siguruara nga burimet e latëpërmendura flasin se para ose pas Vitit të Ri disa deputetë të AKI-së do të pozicionohen ndryshe: ose në një grup të pavarur parlamentar, ose duke iu bashkuar strukturave të VLEN-it, përkatësisht LD-së së Izet Mexhitit ose krahut të Arben Fetahut.
Ndërkohë, brenda vetë koalicionit VLEN, mund të hapet diskutim për udhëheqjen e partisë së re të bashkuar. Emrat që përfliten më shumë për postin e kryetarit janë Bilall Kasami dhe Izet Mexhiti. Në lojë mbetet edhe opsioni i rotacionit: një ndërrim i kryetarit çdo gjashtë muaj.
Nga krahu i AKI-së vazhdojnë të deklarojnë se “uniteti mbetet i pacënuar”, ndërsa BDI përgatitet për kongresin e 20 dhjetorit, ku priten ndryshime të thella brenda kryesisë pas përgjimeve dhe humbjeve në zgjedhjet lokale.
Në prapaskenë, gjithçka është në lëvizje. Pjesa e vetme që mungon është kush do ta thotë fjalën e fundit.
