Në një atmosferë të mbushur me entuziazëm dhe frymë demokratike, Lëvizja Demokratike shënoi një moment historik në Komunën e Dollnenit. Në një takim të rëndësishëm, u zgjodh Xhemaludin Xhaferoski si Kryetar i Degës së Lëvizjes Demokratike për këtë komunë.
Zv/kryeministri dhe kryetari i Lëvizjes Demokratike, Izet Mexhiti, gjatë fjalimit të tij e vlerësoi lart përkrahjen e vazhdueshme që Dollneni ka ofruar për vizionin dhe qëllimet e lëvizjes. Ai theksoi se kjo komunë ka qenë ndër të parat që ka besuar dhe iu është bashkuar thirrjes për ndryshim.
“Dollneni është vendi ku fillon ndryshimi. Nga këtu nisi një rrugëtim që synon një të ardhme më të mirë për çdo qytetar të vendit tonë,” deklaroi Mexhiti.
Ai gjithashtu u zotua, në emër të gjithë funksionarëve të Lëvizjes Demokratike, për përkushtim të plotë ndaj banorëve të Dollnenit, duke theksuar rëndësinë e mbështetjes së projekteve dhe iniciativave që synojnë përmirësimin e jetës së qytetarëve.
“Urime Xhemaludin Xhaferoskit dhe gjithë Degës së Dollnenit për këtë përgjegjësi të re! Ne jemi të bindur se, me përkushtimin e tij dhe mbështetjen tonë, do të sjellim ndryshime pozitive në këtë komunë,” përfundoi Mexhiti.
Banorët e Dollnenit e mirëpritën këtë zhvillim, duke e parë si një mundësi për të forcuar zërin e tyre dhe për të ndikuar në politikat lokale dhe kombëtare.
Lëvizja Demokratike mbetet e përkushtuar për të sjellë progres në çdo cep të vendit, duke ndjekur shembullin e Dollnenit, një komunë që simbolizon frymën e vërtetë të ndryshimit.
