Drejtori gjeneral i SHA MEPSO, Burim Latifi, ka marrë pjesë sot në konferencën e tretë vjetore për digjitalizimin, të organizuar nga Oda Ekonomike Amerikane në Maqedoninë e Veriut (AmCham). Këtë vit, konferenca iu kushtua temës: “Nga vizioni drejt veprimit: Krijimi i një sistemi që ofron rezultate”.
Latifi ishte pjesë e panelit të diskutimit për digjitalizimin dhe sigurinë kibernetike në sektorin energjetik, ku së bashku me përfaqësues nga KRE, EVN, Cisco dhe Tessa Group, u diskutuan sfidat dhe mundësitë kryesore që lidhen me modernizimin e rrjetit elektroenergjetik, zgjidhjet smart-grid, monitorimin digjital si dhe detyrimet e reja ligjore që parashihen në periudhën e ardhshme.
Në fjalën e tij, Latifi theksoi rëndësinë e lartë të sigurisë kibernetike, duke e cilësuar mbrojtjen e infrastrukturës kritike si një nga prioritetet kryesore të MEPSO-s për vitet në vijim. Sipas tij, transformimi digjital duhet të jetë praktik, i sigurt dhe të mbështesë zhvillimin e një sistemi energjetik stabil, modern dhe efikas.
“Transformimi digjital nuk është më zgjedhje, por domosdoshmëri. Qasja jonë duhet të garantojë siguri kibernetike dhe funksionim të pandërprerë të rrjetit energjetik,” u shpreh Latifi.
Konferenca bashkoi ekspertë, institucione dhe kompani nga fusha e teknologjisë dhe energjetikës, me qëllim të shkëmbimit të përvojave dhe nxitjes së proceseve transformuese në sektorin publik dhe privat.
