Lara Colturi e ka mbyllur në vendin e shtatë garën në Botërorin e Skive në Saalbach të Austrisë.
Skiatorja italiane që garon për ngjyrat kuqezi bëri një paraqitje të mirë në slalomin gjigand, por nuk arriti që të ngjitej në podium për të fituar medaljen e parë për të rritur në Kampionatin Botëror.
Në vend të parë doli italiania Federica Brignone. Medalje të argjendtë mori neozelandezja Alice Robinson e pas saj amerikania Paula Moltzan.
Shqipëria merr pjesë për herë të parë në këtë kampionat botëror me një ekip të plotë meshkuj dhe femra.
Skiatori Deni Xhepa do të konkurrojë më 14 shkurt në slalomin gjigand, e një ditë më pas do të jetë sërish radha e Lara Colturi-t
Ndërsa skiataret e Kosovës, Lirika Deva, Arba Pupovci dhe Kiana Kryeziu, nuk arritën sukses në disiplinën e slalomit gjigand.
Asnjëra prej tyre nuk u kualifikua për zbritjen e dytë.
Më 15 shkurt skiatoret e Kosovës do të garojnë në disiplinën e slalomit. Deva u rendit në vendin e 51-të, Pupovci në pozitën e 63-të, ndërsa Kryeziu nuk e përfundoi zbritjen e parë.
