Presidenti amerikan Donald Trump ka vendosur të përjashtojë telefonat inteligjentë dhe kompjuterët nga tarifat reciproke që përfshijnë edhe një taksë të lartë prej 125% për mallrat që vijnë nga Kina.
Dogana dhe Patrulla Kufitare e ShBA-së e konfirmuan përjashtimin përmes një komunikate të lëshuar të premten në mbrëmje. Sipas njoftimit, disa produkte të teknologjisë nuk do t’i nënshtrohen as tarifës globale 10% që aplikohet për shumë vende të tjera.
Ky veprim erdhi pas presionit të madh nga kompanitë amerikane të teknologjisë, të cilat kishin paralajmëruar se tarifat e reja do të çonin në rritje të ndjeshme të çmimeve për konsumatorët, pasi shumë nga komponentët kryesorë dhe pajisjet përfundojnë prodhimin në Kinë.
Përveç telefonave dhe kompjuterëve, përjashtimet përfshijnë edhe pajisje të tjera elektronike dhe përbërës teknikë, siç janë gjysmëpërçuesit, panelet diellore dhe kartat e memories, raportoi BBC, transmeton Insajderi.
