Kuvendi miratoi ndryshimet ligjore për Këshillin Gjyqësor, duke i dhënë fund shkarkimeve sekrete dhe duke parashikuar kritere më të forta për emërime. Procedura e shkarkimit të kryetarit të Këshillit do të jetë publike, saktësohen kriteret për përzgjedhjen e juristit të dëshmuar, ndërkaq emërimi i anëtarëve jogjyqësorë nga Kuvendi të bëhet nëpërmjet debatit publik. Gjithashtu, Këshilli Gjyqësor do të ketë për obligim që në formë të detajuar t’i sqarojë vendimet dhe të personifikojë për përgjegjësitë e gjykatësve, me afate të qartësuara për procedura disiplinore, si dhe mekanizma të sakta për ankesa deri te Këshilli gjyqësor. Por, opozita e pakënaqur me ndryshimet, duke i quajtur sipërfaqësore. Sonja Mirakoska, deputetja opozitare e PRSD-së, doli me kritika për mënyrën e përzgjedhjes së anëtarëve të Këshillit Gjyqësor.
“Ajo që është kyçe dhe që konsideruam se do t’u jepte një ton ndryshe punëve në Kuvend dhe vetë ligjit për Këshill Gjyqësor, vetë ndryshimet ishin rekomandimet sikurse e Komisionit të Venedikut dhe komisionit vlerësues se zgjedhja e anëtarëve të Këshillit Gjyqësor që i zgjedh Kuvendi, do të duhet të bëhen sipas modelit se si ne i zgjedhim anëtarët dhe kryetarin e Komisionit Antikorrupsion.”, – theksoi deputetja e PRSD-së, Sonja Mirakoska.
Por, Antonio Milloshovski theksoi se metodologjia është solide, më cilësore se zgjidhjet e deritashme ligjore.
“Sipas strukturës, mënyra e zgjedhjes sipas metodologjisë është e njëjtë sikurse përzgjedhja e komisionit antikorrupsion. Nga Komisioni i Venedikut nuk kanë vërejtje të kësaj mënyre të zgjedhjes së anëtarëve.”, – theksoi deputeti i VMRO-DPMNE-së, Antonio Milloshovski.
U miratua shpallja për zgjedhjen e kryeprokurorit
Kuvendi gjithashtu votoi shpalljen e emërimit të kryeprokurorit publik pas dorëheqjes së Koceskit.
“Shpresoj se do të kemi konkurs të mirë, do të paraqiten më të mirët dhe do të zgjedhim prokurorin publik më të mirë.”, – u shpreh kryetari i Parlamentit, Afrim Gashi.
Kandidatët e interesuar do të mund të paraqiten në afat prej 15 ditëve pas publikimit të shpalljes në Gazetën Zyrtare. Për prokuror publik mund të emërohet personi i cili është shtetas i Maqedonisë së Veriut, të jetë ekspert i fushës me provim të jurisprudencës. E drejta e konkurrimit i jepet edhe personave, të cilët dhjetë vite radhazi kanë punuar si prokurorë publik apo gjykatës penal.
