Gjykata Kushtetuese e Republikës së Maqedonisë së Veriut do të mblidhet këtë të mërkurë për të vlerësuar kushtetueshmërinë e Ligjit që mundëson vendosjen e sistemit të monitorimit “Safe City” (Qyteti i Sigurt).
Gjyqtarja kushtetuese, Ana Pavllovska Daneva, gjatë një paraqitjeje televizive, njoftoi se deri te ky institucion janë dorëzuar tre iniciativa për këtë çështje: iniciativa nga ASH e Arben Taravarit, ASH e Ziadin Selës dhe nga një student i Fakultetit Juridik.
Sipas gjyqtares Daneva, të tria iniciativat janë bashkuar në një lëndë të vetme, e cila tashmë është vendosur si pikë e rendit të ditës për seancën e radhës.
Një risi e rëndësishme për këtë proces është se opinioni do të ketë mundësi t’i ndjekë debatet dhe vendimmarrjen në kohë reale. Javën e kaluar, Gjykata Kushtetuese mori vendim që seancat të jenë të hapura për publikun, duke rritur kështu transparencën e këtij institucioni të lartë juridik.
Sistemi “Safe City” ka shkaktuar debate të shumta në opinion lidhur me mbrojtjen e të dhënave personale dhe privatësinë e qytetarëve, pika të cilat pritet të jenë në fokus të shqyrtimit kushtetues.
