Kryetari i Lëvizjes Vetëvendosje, Albin Kurti ka thënë se partia e tij është fituese e zgjedhjeve parlamentare dhe sipas tij është ajo që do ta formojë qeverinë e ardhshme.
Ai para selisë së Lëvizjes Vetëvendosje ka thënë se zgjedhjet ishin të lira, demokratike dhe të ndershme.
“Pra jemi të parët dhe ky është një konfirmim për qeverisjen tonë të mirë e të mbarë, demokratike dhe progresiste. Koalicioni ynë fitues do ta formojë qeverinë e re Kurti 3 dhe në këtë mënyrë ne do të vazhdojmë edhe ato punët të cilat i kemi nisur por edhe shumë të tjera të reja në përputhje me zotimet tona”, deklaroi Kurti.
Kandidati për kryeministër, Albin Kurti tha se sot ka fituar populli dhe Vetëvendosja.
“Besoj që qytetarët e Kosovës e kanë dëshmuar suksesshëm rezistencën e tyre edhe kundër një lufte të paparë hibride që është bërë kundër koalicionit tonë, me ç’rast oligarkë, sidomos njëri prej tyre ka shpenzuar para pa hesap, kanë kërcënuar punëtorët dhe gjithashtu kemi pasur premtimet më absurde të mundshme në këtë fushatë të cilët kanë krijuar një atmosferë iracionale por përkundër të gjitha këtyre populli fitoi, fitoi Vetëvendosja, ne jemi subjekt i parë, subjekti fitues i cili do ta formojë qeverinë e ardhshme. Të gjithë e kanë të qartë, se ata që dolën të dytët dhe të tretët edhe po mblidhen bashkë nuk bëjnë sa Vetëvendosje”, deklaroi ai.
Lëvizja Vetëvendosje është në koalicion me partinë Guxo dhe Alternativa.
