Senegali është skuadra e parë finaliste e Kupës së Afrikës 2025/26. Skuadra ‘Luanët e Terangës’ eliminuan në gjysmëfinale Egjiptin duke e mundur me rezultatin e ngushtë 1-0 ku njeriu i ndeshjes për senegalezët u bë pikërisht Sadio Mane, ish futbollist i Liverpool dhe Bayernit të Mynihut.
Në Stade Ibn Batouta të Tangerit që priti këtë gjysmëfinale të parë të Kupës së Afrioës, pjesa e parë nuk dhuroi shumë emocione dhe u mbyll me barazimin 0-0 me Senegalin që humbi shërbimin e mbrojtësit të tyre, Koulibaly në minutën e 23 për shkak të një dëmtimi.
Ai që mendoi t’i kthejë buzëqeshjen Senegalit ishte pikërisht Sadio Mane në minutën e 78; ish sulmuesi i Liverpool dhe Bayernit të Mynihut shënoi golin e avantazhit 1-0 për skuadrën e tij me një gjuajtje të fortë me të djathtën nga jashtë zone. Ky ishte goli që vendosi përfundimisht fatin e kësaj ndeshjeje me Senegalin që do të luajë finalen e 18 janarit, ndërsa Egjipti i Mohamed Salah do të jetë i detyruar të luajë finalen e vogël për vendin e tretë.
