Në podcastin PIKË u tha se lufta në Ukrainë, Ballkani i Hapur dhe ideja e shkëmbimit të kufijve lidhen me projektin afatgjatë të Rusisë për rishikimin e kufijve në Evropë. Kulla përmendi edhe vizitën e Lavrovit në Shkup.
Në podcastin PIKË, publicisti Veton Surroi dhe analisti i gjeopolitikës Ilir Kulla diskutuan luftën në Ukrainë dhe strategjinë afatgjatë të Rusisë për ndryshimin e kufijve në Evropë përmes forcës dhe ndikimit politik.
Sipas Kullës, lufta në Ukrainë nuk është një konflikt i izoluar, por pjesë e një projekti më të gjerë rus për zgjerim territorial, i cili ka nisur që nga viti 2008 me Abhazinë dhe ka vazhduar në vitin 2014 me aneksimin e Krimesë. Ai theksoi se Moska ka shfrytëzuar dobësinë dhe naivitetin perëndimor për të avancuar këtë strategji.
Veton Surroi rikujtoi se presidenti rus Vladimir Putin nuk e ka fshehur asnjëherë ambicien për të “korrigjuar” kufijtë e humbur pas shpërbërjes së Bashkimit Sovjetik, të cilin e ka cilësuar si “fatkeqësinë më të madhe” për Rusinë. Sipas Surroit, kjo filozofi ka udhëhequr veprimet ruse në Ukrainë dhe përbën rrezik edhe për rajone të tjera, përfshirë Ballkanin.
Në këtë kontekst, Surroi përgëzoi Kullën për qëndrimin e tij kundër idesë së shkëmbimit të kufijve mes Kosovës dhe Serbisë, duke theksuar se një projekt i tillë përputhet me interesat strategjike ruse në rajon.
Duke folur për Ballkanin, Kulla deklaroi se edhe iniciativa si Ballkani i Hapur dhe diskutimet për ndryshim kufijsh nuk mund të shkëputen nga strategjia ruse për rishikimin e rendit territorial në Evropë. Ai theksoi se ardhja e ministrit të Punëve të Jashtme të Rusisë, Sergei Lavrov, në Shkup, me ftesë të ish-ministrit Bujar Osmani, kishte për qëllim pikërisht avancimin e këtij projekti.
Sipas Kullës, doktrina ruse mbështetet në parimin se “aty ku ka kisha sllave, aty është kufiri rus”, duke përdorur fenë, identitetin etnik dhe historinë si instrumente për zgjerim territorial dhe ndikim politik. Ai paralajmëroi se kjo qasje përbën rrezik serioz për stabilitetin e Ballkanit dhe për arkitekturën e sigurisë evropiane.
Të dy bashkëbiseduesit u pajtuan se lufta në Ukrainë ka ndryshuar thellësisht rendin e sigurisë në Evropë dhe se pasojat e saj do të ndihen për një kohë të gjatë, jo vetëm në Ukrainë, por edhe në Ballkan dhe më gjerë.
