Qytetarët duhet të bëjnë kujdes dhe të numërojnë deri në 5. Me kartelë pa kontakt mund të paguajnë katër herë, por për pagesën e pestë duhet të vendoset PIN kodi. E njëjta ndodh edhe nëse paraprakisht keni blerë diçka në vlerë prej mbi 9 000 denarë. Bëhet fjalë për risi që funksionon nga tetori i këtij viti, por askush nuk i ka informuar qytetarët. Përvojë të pakëndshme kanë pasur shumë qytetarë që iu drejtuan redaksisë sonë. Thonë se jashtë vendit edhe pse kanë pasur para në kartelë kanë mbetur ka kokërr denari.
“Isha disa ditë jashtë vendit dhe mbeta pa denarë edhe përkundër asaj që në llogari kisha para. Pas katër pagesave në market me kartelën, çdo transaksion i ardhshëm, që duhej të paguaja, m’u refuzua. Duhej të huazoja para nga miqtë. Sapo u ktheva në Shkup, në bankë më thanë se pas pagesës së pesë, pa kontakt, duhet ta vendosi kartelën në terminal dhe të konfirmojë PIN-in. Jashtë vendit sigurisht nuk e bëra që terminali të mos ma marrë kartelën. Në mënyrë të tillë, me bënë që të nxjerr shumë më të madhe kesh dhe fare të mos e shfrytëzojë kartelën. Në çdo mënyrë, përvojë e hidhur. Për rregullat e reja nuk isha i informuar”, tha një qytetar për TV21.
Nga Banka Popullore për TV21 e konfirmuan këtë. Vendimi është në fuqi që nga janari i vitit 2023, por ka qenë me prapaveprim, që bankat të kenë kohë të adaptojnë terminalet e tyre.
“Në rast kur janë kryer katër pagesa me kartelë pa kontakt, në transaksionin e pestë pa kontakt banka duhet patjetër të kërkojë vendosje të PIN-it ose nëse shuma e përgjithshëm e transaksioneve tejkalon 9000 denarë. Shpjegojmë se me rregulloren e re sigurohet siguri më e madhe në kryerjen e pagesave dhe mbrojtjen e shfrytëzuesve të shërbimeve pagesore dhe bankave nga skenarët e njohur për mashtrime. Mekanizmat e njëjtë mbrojtës janë në fuqi në gjithë vendet anëtare të BE-së, pas çka është bërë adaptim me praktikat më të mira”, thonë për TV21 nga Banka Popullore e Maqedonisë.
Përveç kësaj, në vendet e shitjes ku ka mundësi për pagesë pa kontakt duhet të vendoset kodi PIN edhe nëse transaksioni tejkalon shumën prej 3000 denarëve. Nga Banka Popullore shpjegojnë se bëhet fjalë për akt nënligjor që është sjellë në përputhje me Ligjin e ri për shërbime pagesore dhe sisteme për pagesa.
