Kryetari i Komunës së Çairit Izet Mexhiti zhvilloi një takim emocional dhe shumë domethënës me babain e dëshmorit të Koshares, Mujdin Aliu, një prej figurave të paharrueshme të Ushtrisë Çlirimtare të Kosovës.
Në një deklaratë për media, kryetari theksoi se ky takim ka qenë një prej momenteve më të ndjera të ditëve të para të mandatit të tij:
“Takimi me babain e dëshmorit Mujdin Aliu ishte një kujtesë e fuqishme e sakrificës që kanë bërë familjet tona për lirinë. Qetësia, urtësia dhe dinjiteti i tij të lënë pa fjalë. Ai nuk flet vetëm për një djalë – ai flet për një amanet, për një dritë që na udhëheq ende sot.”
Mexhiti tha se figura e Mujdin Aliut është e skalitur në kujtesën e kombit dhe se Çairi do të vazhdojë të nderojë veprën e tij:
“Mujdini është një prej emrave më të respektuar të brezit të lirisë. Heroizmi i tij në Koshare nuk është histori, por themel i së ardhmes sonë. Ne do të kujdesemi që brezat e rinj të mësojnë për sakrificat e tij dhe të gjithë dëshmorëve tanë.”
Ai falënderoi babain e Mujdinit për vizitën dhe për urimet në detyrën e re, duke theksuar:
“Nderi i shërbimit është edhe më i madh kur e di se ecim mbi gjurmët e atyre që dhanë gjithçka për këtë vend. Çdo përgjegjësi që mbajmë sot është edhe falë sakrificës së tyre.”
Komuna e Çairit njoftoi se do të vazhdojë me iniciativa që ruajnë dhe promovojnë kujtimin e heronjve të kombit, si edhe mbështetjen e familjeve të dëshmorëve.
