Kryesia e koalicionit VLEN nga sot numëron 23 anëtarë që burojnë nga të gjitha 4 subjektet brenda koalicionit, LD, Lëvizja BESA, Alternativa dhe Vetëvendosja. Ky është një prej hapave drejt formësimit të partisë së përbashkët. Kreu i LD-së, Izet Mexhiti tha se me shkrirjen në një subjekt të vetëm, VLEN ka për qëllim t’u mundësojë votuesve pluralizëm dhe mundësi për vlerësim dhe përzgjedhje mes dy taborësh. Sa i përket kërkesës së BDI-së për zgjedhje të parakohshme parlamentare, Mexhiti tha se nuk ka nevojë të mendohet për një gjë të tillë pasi as numrat dhe as situata nuk e diktojnë një gjë të tillë, ai theksoi se qeveria është stabile, ndërsa me BDI-në do të maten në zgjedhjet lokale të tetorit.
“Ashtu siç paralajmëruam para qytetarëve se vazhdojmë procesin e shkrirjes së subjekteve në një subjekt të vetëm të VLEN-it, që shqiptarët, votuesit të kenë dy taborë, pra VLEN-in dhe Frontin Evropian, pra të kenë pluralizëm, mundësinë për përzgjedhje dhe ashtu siç patëm në zgjedhjet parlamentare, të kenë mundësinë edhe në zgjedhjet lokale në tetor që të bëjnë vlerësimin dhe përzgjedhjen ndërmjet Vlenit dhe BDI-së”, tha Izet Mexhiti, VLEN.
