Ish-presidenti i Kosovës, Behgjet Pacolli, pasditen e sotme njoftoi se shteti i kontinentin afrikan, Kenia, ka njohur pavarësinë e Kosovës, vendim i cili u nënshkrua nga presidenti i këtij vendi, William Ruto.
Ky lajm u mirëprit në vend, teksa u përshëndet nga liderët e vendit.
Media kroate “Index” ka raportuar për këtë njohje, teksa ka treguar se si presidenti serb, Alleksandar Vuçiq, e kishte dërguar bashkëshorten e tij, Tamara në Kenia së fundmi për të, siç tha, “parandaluar njohjen e Kosovës”, transmeton Klankosova.tv.
“Njohja e Kosovës vjen disa muaj pasi Serbia nisi një ofensivë diplomatike për ta parandaluar atë. Në tetor të vitit të kaluar, Tamara Vuçiq, gruaja e presidentit serb Alleksandar Vuçiq, u dërgua në Nairobi si pjesë e fushatës diplomatike të Serbisë”.
“Vizita e saj ishte e paparalajmëruar, gjë që nxiti më tej spekulimet se qëllimi i udhëtimit ishte pikërisht lobimi kundër njohjes së Kosovës. Gruaja e Vuçiqit më pas mori pjesë në bisedime me kryeministrin kenian Musalia Mudavadi dhe ministrin e Punëve të Jashtme, ku theksi u vu në forcimin e marrëdhënieve dypalëshe dhe bashkëpunimin ekonomik ndërmjet Serbisë dhe Kenias”.
“Përveç bisedimeve diplomatike, Serbia ka premtuar edhe ndihmë financiare për Kenian, duke përfshirë një donacion prej 150,000 eurosh për viktimat e përmbytjeve. Vuçiqi ka vizituar edhe lagjen e varfër Mukuru në Nairobi, ku ka përcjellë mesazhin e ‘vullnetit të mirë’ të presidentit serb”.
“Gruaja e Vuçiqit ka kërcyer me femra vendase në Kenia”, shkroi media kroate “Index”.
Megjithatë, ky medium thotë se edhe përkundër këtyre përpjekjeve, vendimi për njohjen e Kosovës megjithatë u mor dhe Kenia u bë vendi i fundit në një seri shtetesh që mbështesin pavarësinë e Kosovës.
Ministria e Jashtme e Serbisë e ka dënuar ashpër vendimin e Kenias, duke e quajtur atë një “shkelje të rëndë të ligjit ndërkombëtar” dhe një “shkelje të drejtpërdrejtë të Rezolutës 1244 të Këshillit të Sigurimit të Kombeve të Bashkuara”.
“Një vendim i tillë minon përpjekjet që synojnë dialogun konstruktiv, stabilitetin rajonal dhe respektimin e rendit juridik ndërkombëtar. Ai gjithashtu vendos një precedent të trishtuar në marrëdhëniet tradicionalisht miqësore midis Serbisë dhe Kenisë”, thuhet në deklaratë.
Ministria tha se Serbia do të marrë “të gjitha masat e nevojshme diplomatike dhe politike” për t’iu përgjigjur masës së Kenias. /Klankosova.tv
