Kryetari i Komunës së Butelit dhe kandidati për mandat të dytë nga radhët e VMRO-DPMNE-së, Darko Kostovski, ka bërë të ditur se ka përfunduar rindërtimi i plotë i “Rrugës 1” në fshatin Luboten, një projekt i shumëkërkuar nga banorët që prej vitit 1998.
“Fjalën e dhënë po e realizojmë! Në Luboten e përmbushëm premtimin ndaj qytetarëve. Rruga 1 është rindërtuar plotësisht. Realizojmë një kërkesë disavjeçare, më nuk ka qytetarë të harruar në Komunën e Butelit!”, ka shkruar Kostovski në një postim në Facebook.
Ai ka theksuar se rruga kalon pranë shkollës fillore dhe se për më shumë se dy dekada nuk ishte prekur nga asnjë investim. Kostovski njoftoi gjithashtu se në fazën e fundit janë asfaltuar disa rrugë të tjera, ndërsa ditëve në vijim do të nisë edhe rindërtimi i një pjese të “Rrugës 3”.
Sipas tij, ofensiva ndërtimore në komunë po zhvillohet me dinamikë të fortë, me prioritet për zonat ku më parë nuk ka pasur kurrë asfalt.
“Po sigurojmë zhvillim të barabartë dhe të qëndrueshëm për të gjitha vendbanimet e komunës,” përfundon Kostovski.
