Artan Grubi ndodhej në stop listën e policisë, “ndaloje dhe raportoje”. Në kalimin kufitar në Bllacë ai është evidentuar se ka kaluar në këmbë. Këtë ia ka mundësuar polici B.J. të cilin MPB e ka pezulluar dhe larguar nga vendi i punës deri në përfundimin e masës disiplinore.
Ndërkohë përgjegjësi i ndërrimit në Bllacë, B.A. sipas policisë ka mbahet përgjegjës për shkelje të rëndë, pasi nuk i ka furnizuar policët me kamera të trupit dhe nuk e ka evindetuar mungesën e tyre.
Në një njoftim të MBP-së thuhet se, kontrolli i brendshëm ka konstatuar se zyrtari policor B.J me punën e tij të pandërgjegjshme nuk ka kryer kontrolle adekuate të veturës ‘Mercedes’ gjatë kalimit të kufirit, nuk e ka evidentuar se është duke dalë jashtë kufirit, ndërsa udhëtarët, A.P me dokumente diplomatike si drejtues i veturës si dhe A.G. i ka regjistruar se kanë kaluar në këmbë dhe nuk ka pritur që sistemi t’i vërtetojë nëse ndaj personit ka pasur masë aktive, “ndaloje dhe raportoje”.
Artan Gmrubi, tanimë zyrtarisht i arratisur, ka angazhuar avokat Vlladimir Donevskin, por ai nuk iu përgjigj thirrjeve tona. Nga ana tjetër avokati nga Shkupi, Antonio Apostollski, do të jetë përfaqësues ligjor i ish-drejtorit të Lotarisë Shtetërore, Përparim Bajrami, në rastin e keqpërdorimeve në këtë Institucion, ku Bajrami është i dyshuari kryesor. Bajrami ende mbetet i pakapshëm për organet e vendit. Gjykata i caktoi masën e paraburgimit prej 30 ditë. Në bisedë telefonike për Alsat, Apostollski thotë se Bajrami nuk është në arrati, por ka disa muaj që është zhvendosur dhe nuk jeton në Maqedoni.
“Sot kam marrë autorizim për të përfaqësuar Bajramin dhe jam angazhuar nga një anëtar i familjes së tij. Bajrami nuk është në arrati, por që prej disa muajsh është shpërngulur jashtë Maqedonisë. Fillimisht do të kërkojmë qasje në rast, për të parë se për çfarë akuzohet konkretisht, pastaj do të vazhdojmë më tej”, tha – Antonio Apostollski, avokat i Përparim Bajramit.
Antonio Apostollski, Avokat i Përparim Bajramit
• Familjari i Përparimit angazhoi Apostollskin
• Bajrami është shpërngulur nga Maqedonia
• Do të kërkohet qasje në rast
Policia tashmë ka lëshuar fletarrest ndërkombëtar për Grubin dhe Bajramin, ndërsa në rastin e keqpërdorimeve në “Lotarinë Shtetërore” ku është bërë dëm prej mbi 8 milionë eurove janë përfshirë edhe ish kryeministri Dimitar Kovaçevski dhe ish sekretari i përgjithshëm i Qeverisë, Metodia Dimovski. Paraburgim prej 30 ditë përveç Bajramit është caktuar edhe për Artan Grubin.
