Maqedonia mund të ec drejt BE-së, vetëm nëse është e sigurt në identitetin e saj. Kështu tha Hristijan Mickoski, në kongresin partiak për rizgjedhjen e tij në krye të partisë. Mickoski u fokusua te gjuha, identiteti, e historia duke theksuar se ato janë shtyllat themelore të shtetit dhe asnjë kompromis politik ndërkombëtar nuk duhet t’i prek.
“Maqedonia është shtet i ndërtuar mbi vlerat evropiane, lirinë, traditën demokratike dhe sundimin e së drejtës dhe prandaj vendi i saj është lidhur natyrshëm me familjen euroatlantike. Por integrimi evropian dhe euroatlantik nuk duhet të përkulen në pranimin pasiv ose varësi pa kusht. Shteti i vogël mund të jetë shtet i fortë nëse ka vetëbesim, ndjenjën e rëndësisë së vet dhe qëndrim të qartë për interesat e veta. Maqedonia duhet të dijë të thotë po, kur diçka është në interesin e saj, por edhe të thotë jo, ku shkelen parimet e saj, dinjiteti ose identiteti. Partneriteti me NATO-në dhe BE-në, mund të jetë i fuqishëm, vetëm nëse është i barabartë”, tha Hristijan Mickoski, Kryetar i VMRO-DPMNE-së .
Në kongresin e 18-të të partisë në Kavadar, Mickoski shpalosi programin mbi baza të të cilit partia do të fokusohet deri në 2030-tën. Ai tha se integrimi në proceset dixhitale, automatizimi dhe tranzicioni energjetik paraqesin drejtim strategjik prioritar, ndërsa vendi duhet të fokusohet në drejtim të uljes së varësisë nga jashtë dhe të krijojë dinamikë të re ekonomike.
“Inteligjenca Artificiale është fusha e re e gravitetit e fuqisë globale. Vendet që investojnë në inteligjencë artificiale sigurojnë përparësi ekonomike, të sigurisë, dhe përparësi institucionale, vendet që e injorojnë mbeten të varura nga sisteme të huaja, teknologji të huaja dhe interesa të huaja. Maqedonia duhet të ndalojë së qenuri konsumues pasiv i teknologjisë së huaj, dhe të bëhet pjesëmarrës aktiv në ekonominë e re inteligjente”, shtoi ai.
Mbajtja e kongresit të partisë, mund t’i hap rrugën rikonstruimit më të thellë të qeverisë, për çka Mickoski foli kohë më parë. Ai gjatë një prononcimi pas përfundimit të zgjedhjeve lokale, pati deklaruar se për momentin do të mbushen vetëm pozitat që u liruan nga Izet Mehxhiti i cili u zgjodh kryetar i Çairit, ndërsa për rikonstruim më të thellë eventual pati theksuar se do të vendoset pas kongresit të 6 dhjetorit./Alsat.mk
