Sot në Shkup u zhvillua Konferenca rajonale ” Empowered – Sfidat dhe mundësitë për përfshirjen sociale dhe në punë të personave me aftësi të kufizuara në Ballkanin Perëndimor”, ku morën pjesë më shumë se 100 pjesëmarrës nga të gjitha rajonet, përfshirë përfaqësues të ministrive, organizatave ndërkombëtare, shoqatave të personave me aftësi të kufizuara, autoriteteve lokale dhe ekspertë.
Konferencën e hapi zyrtarisht zëvendësministri i Politikës Sociale, Demografisë dhe të Rinjve i Republikës së Maqedonisë, Gjoko Velkovski, i cili në fjalimin e tij theksoi:
“Me një vizion të qartë, vullnet të fortë politik dhe partneritete që shkojnë përtej interesit kombëtar, sot tregojmë se Republika e Maqedonisë së Veriut nuk po pret – por po vepron. Kjo konferencë nuk është vetëm një forum, por një mesazh politik dhe shoqëror se jemi të gatshëm si Qeveri, si institucione dhe si shoqëri të investojmë në politika gjithëpërfshirëse që sjellin ndryshime të vërteta në terren. Veprimi dhe angazhimi ynë politik është i thjeshtë – askush nuk duhet të lihet pas dore. Jo vetëm në letër, por edhe në realitet.”
Brenda tre paneleve tematike – Inclusive Balkans, From Policy to Practice dhe The Way Forward, pjesëmarrësit debatuan mbi sfidat dhe mundësitë që lidhen me punësimin, arsimin, aksesin në shërbime dhe bashkëpunimin ndërsektorial. Theks i veçantë u vu në nevojën për të forcuar partneritetet publik privat dhe për të shfrytëzuar në mënyrë efektive fondet ekzistuese për përfshirjen lokale.
Një nga rezultatet kryesore ishte arritja e konsensusit mbi krijimin e një Grupi Punues Rajonal për Përfshirjen e Personave me Aftësi të Kufizuara, si dhe inicimi i një Deklarate të përbashkët mbi Përfshirjen në nivelin e Ballkanit Perëndimor. Pjesëmarrësit prezantuan praktikat dhe idetë e mira për projekte specifike që do të zbatohen në komunitetet partnere në vitet e ardhshme.
