Një denoncim publik ka ngritur shqetësime lidhur me mosvazhdimin e kontratave të 11 personave të angazhuar në Komunën e Studeniçanit, vendim që thuhet se është marrë nga kryetari i komunës, Ejup Abazi.
Sipas reagimeve, mbetet e paqartë arsyeja reale pse këtyre 11 të punësuarve nuk u janë vazhduar kontratat e punës, duke lënë po aq familje pa burim të ardhurash. Denoncimi ngre dyshime nëse ky vendim ka prapavijë politike dhe nëse bëhet fjalë për hakmarrje, apo nëse ekzistojnë arsye të tjera ligjore, administrative apo financiare.
Gjithashtu, kërkohet sqarim nëse personat e prekur janë paralajmëruar dhe njoftuar me kohë për mosvazhdimin e kontratave, siç parashikohet me procedurat ligjore dhe praktikat e rregullta të punës.
Deri më tani, nga Komuna e Studeniçanit dhe nga kryetari Ejup Abazi nuk ka pasur një reagim apo sqarim zyrtar lidhur me këtë çështje. Qytetarët dhe palët e interesuara presin transparencë dhe përgjigje institucionale për arsyet e këtij vendimi, i cili ka nxitur reagime dhe shqetësim në opinionin publik.
