Po shqyrtohet mundësia që transportuesit të kategorizohen në të njëjtën kategori me pilotët dhe makinistët e trenave, thanë përfaqësuesit e Komisionit Evropian (KE) gjatë takimit online të sotëm me ministrat përgjegjës nga vendet e Ballkanit Perëndimor. Sipas rregullave të reja për hyrje dhe dalje nga BE-ja, këta transportues do të përballeshin me qëndrim të kufizuar në zonën Schengen. Përfaqësuesit evropianë konfirmuan se transportuesit njihen si profesionistë dhe njoftuan përkushtim të plotë për gjetjen e një zgjidhjeje të qëndrueshme që do të jetë në interes të të gjitha palëve të përfshira.
Ministri i Transportit, Aleksandar Nikoloski, i cili mori pjesë në takimin online së bashku me Ministrin e Punëve të Brendshme, Pançe Toshkovski, dhe Zëvendës-Ministren për Çështjet Evropiane, Viktoria Trajkov, theksoi se, ndërsa pritet një zgjidhje përfundimtare, KE duhet të identifikojë realisht problemin në sektorin e transportit dhe të zbatojë sa më shpejt masa që do të sigurojnë funksionimin e pandërprerë të transportuesve.
Për të adresuar problemet me transportuesit, sipas njoftimeve, do të formohet një grup pune në nivel ekspertësh, i cili pritet të mblidhet javën e ardhshme dhe të konkretizojë përfundimet e takimit të sotëm, ndërsa përfaqësuesit e KE-së thanë se komunikimi midis të gjitha palëve të përfshira do të vazhdojë.
Gjithashtu, gjatë takimit u theksua se regjistrimi biometrik përmes sistemit elektronik për hyrje dhe dalje nga vendet e zonës Schengen, në vend që të fillonte nga muaji prill, do të shtyhet deri në shtator të këtij viti.
Takimi i sotëm, ku morën pjesë ministrat e vendeve të Ballkanit Perëndimor, u iniciua nga përfaqësuesit e KE-së pas bllokimit të pikave kufitare me zonën Schengen nga transportuesit e vendit dhe rajonit, për shkak të kufizimeve të njoftuara për qëndrimin e tyre në Schengen pas futjes së sistemit të ri të hyrjes në BE.
