Kuvendi miratoi nismën e shumicës parlamentare për themelimin e Komisionit Anketues, që do të trajtonte rrethanat e të gjitha tragjedive të ndodhura në vend. Deputeti i VMRO-DPMNE-së, Bojan Stojanovski, tha se Kuvendi e ka për obligim që të japë përgjigjet për të gjitha tragjeditë.
“Kuvendi si organ e ka për obligim ndaj qytetarëve që të japë përgjigjet për të gjitha tragjeditë që kanë ndodhur, veçanërisht për shkak se pjesa më e madhe e popullsisë, akoma kërkon përgjigje dhe konsideron se ato përgjigje që janë dhënë për tragjedi paraprake nuk i përfshijnë të gjithë fajtorët që duhet të nxirren para drejtësisë.”, – deklaroi deputeti i VMRO-DPMNE-së, Bojan Stojanovski.
Opozita gjithashtu ka dorëzuar kërkesë për formimin e Komisionit Anketues, por vetëm për tragjedinë e Koçanit, e cila u refuzua. Kreu i socialdemokratëve, Filipçe, u shpreh se do të mbështesin dy iniciativat, pasi sipas tij, duhet të zbardhen të gjitha dilemat për të gjitha tragjeditë, por tragjedia për Koçanin duhet të trajtohet si e veçantë.
“Apeloj të gjithë deputetët që tani të mbështesin formimin dhe mbajtjen e Komisionit Anketues vetëm për tragjedinë në Koçan. Thamë, nuk e kemi problem, do të votojmë dhe do ta mbështesim edhe atë nismë të VMRO – DPMNE-së dhe koalicionit qeverisës, në të cilën duan që të bisedohet për të gjitha tragjeditë paraprake.”, – theksoi Venko Filipçe nga LSDM.
Deputetët e ASh-së tentuan të ndërhyjnë me amendamente, por nuk gjetën mbështetjen e shumicës.
“Është e rëndësishme që komisioni të ketë mandat për të hetuar institucionet dhe personat udhëheqës, pra, jo vetëm individët me tituj publik. Pra, përmes amendamentit kërkojmë që komisioni të ketë mundësi të shqyrtojë strukturën institucionale, gjë që rrit mundësinë për gjetje të plota.”, – u shpreh deputetja e ASh-së, Ilire Dauti.
VMRO-DPMNE kërkoi nga Dimitar Apasiev, kryetar i Komisionit për të Drejtat dhe Liritë e Njeriut, që të shtyjë seancën e caktuar më 9 dhjetor në të cilën do të marrin pjesë edhe prindërit e viktimave në diskotekën “Puls”, pasi që në po të njëjtën ditë nis plenarja për buxhetin. Apasievi tha se nuk do të shtyjë mbajtjen e seancës, pasi sipas tij, prindërit e viktimave mund vetëm atë ditë të jenë pjesëmarrës.
