Koalicioni VLEN ka definuar dhe thuajse ka finalizuar marrëveshjen e brendshme për riformatim të pjesshëm të përfaqësimit në Qeveri, ndërsa këtë javë pritet që vendimi të marrë dritë dhe të zyrtarizohet brenda koalicionit qeverisës, mëson INA.
Sipas marrëveshjes, në postin e ministrit të Mjedisit Jetësor, në vend të Izet Mexhitit, do të emërohet Muhamet Hoxha, kuadër me përvojë në ekzekutiv, i cili më herët ka ushtruar edhe funksionin e zëdhënësit të Qeverisë.
Deputeti Bekim Sali pritet të emërohet zëvendëskryeministër për Qeverisje të Mirë, në vend të Arben Fetait, ndërsa njëkohësisht do të ushtrojë edhe detyrën e zëvendëskryeministrit të parë.
Arben Fetai do të marrë drejtimin e ministrisë për Integrime Evropiane. Ai njihet për përvojën e tij në diplomaci dhe proceset e integrimeve, duke qenë më herët i përfshirë në institucionet e Bashkimit Evropian në Bruksel.
Ministri aktual për Integrime Evropiane, Orhan Murtezani, sipas marrëveshjes, pritet të transferohet ose në pozitën e zëvendësministrit të Mbrojtjes.
Gjatë ditëve në vijim, VLEN pritet t’ia dorëzojë këto propozime Qeverisë, pas së cilës procedurat formale do të vazhdojnë në Kuvend. Ky riformatim i pjesshëm vjen pas zgjedhjes së Izet Mexhitit kryetar i Komunës së Çairit, ndërsa pas janarit priten ndryshime edhe më të mëdha brenda Qeverisë. (INA)
