Qyteti i Shkupit ka pranuar iniciativën e lëvizjes “Zelen Human Grad” për dislokimin e fabrikës së çimentos “Usje” nga Komuna e Kisella Vodës në Shkup.
Dje u mbajt një bllokadë në kryqëzimin ndërmjet bulevardeve “Boris Trajkovski” dhe “Serbia”, ku protestuesit kërkuan dislokimin e fabrikës Usje.
Pas seancës së djeshme, Qyteti i Shkupit u obligua t’i drejtohet Ministrisë së Mjedisit Jetësor me kërkesë zyrtare për të hetuar funksionimin e Usjes dhe të gjithë ndotësve të mëdhenj industrialë, nëse ata i përmbushin të gjitha kushtet dhe rregulloret ligjore që burojnë nga leja e vlefshme e punës dhe nga legjislacioni përkatës mjedisor, si dhe që në afatin më të shkurtër ta informojnë Qytetin e Shkupit.
“Pas një seance 13-orëshe, Këshilli i Qytetit të Shkupit njëzëri e miratoi iniciativën tonë me përfundimet në vijim, zbatimin e të cilave do ta ndjekim me përkushtim të madh:
Qyteti i Shkupit obligohet t’i drejtohet Ministrisë së Mjedisit Jetësor me kërkesë zyrtare për të hetuar funksionimin e Usjes dhe të gjithë ndotësve të mëdhenj industrialë, si dhe nëse ata i përmbushin plotësisht të gjitha kushtet, obligimet dhe kriteret që rrjedhin nga leja e vlefshme e punës dhe legjislacioni përkatës mjedisor, dhe që në afatin më të shkurtër ta informojnë Qytetin e Shkupit për rezultatet.
Kërkohet nga Inspektorati Shtetëror për Mjedisin Jetësor të kryejë një seri inspektimesh të jashtëzakonshme dhe të paparalajmëruara mbi funksionimin e Usjes dhe të gjithë ndotësve të mëdhenj industrialë, me qëllim përcaktimin e gjendjes faktike, respektimin e standardeve mjedisore, emetimeve të lejuara dhe zbatimin e masave për mbrojtjen e mjedisit dhe shëndetit të qytetarëve.
Ftohet Komuna e Kisella Vodës, në bazë të gjetjeve, parametrave dhe mendimeve të marra nga Ministria e Mjedisit Jetësor dhe Inspektorati Shtetëror për Mjedisin Jetësor, të tregojë kujdes të veçantë gjatë hartimit të mëtejshëm të planeve urbanistike (DUP), si dhe t’i marrë parasysh ato në të gjitha procedurat e ardhshme urbanistike dhe planifikuese.
E njëjta obligim vlen edhe për komunat e tjera në përbërje të Qytetit të Shkupit dhe për vetë Qytetin e Shkupit, me qëllim sigurimin e një qasjeje të harmonizuar, të përgjegjshme dhe të qëndrueshme në planifikimin hapësinor dhe urbanistik, në interes të mbrojtjes së mjedisit dhe cilësisë së jetës së qytetarëve.
Obligohet kryetari i Qytetit të Shkupit t’i drejtohet Qeverisë për të shqyrtuar mënyrën e fillimit të procedurës për dislokimin e Usjes dhe të gjithë ndotësve të mëdhenj industrialë në lokacione të përshtatshme jashtë luginës së Shkupit, në përputhje me Ligjin për Mjedisin Jetësor dhe Planin Hapësinor të RMV-së.
Ky përfundim t’u dorëzohet kryetarit të Qytetit të Shkupit, Qeverisë së RMV-së, Ministrisë së Mjedisit Jetësor, Inspektoratit Shtetëror për Mjedisin Jetësor dhe komunave të Qytetit të Shkupit”, thuhet në njoftimin e “Zelen Human Grad”.
